ഗാർഗി കോളജിലെ ലൈംഗിക അതിക്രമം: ഡൽഹി പൊലീസ് കേസെടുത്തു

ന്യൂഡൽഹി ∙ സൗത്ത് ഡൽഹിയിലെ ഗാർഗി കോളജിൽ ലൈംഗിക അതിക്രമം ഉണ്ടായെന്ന പരാതിയിൽ ഡൽഹി പൊലീസ് കേസെടുത്തു. കോളജ് അധികൃതരാണ് പരാതി നൽകിയത്. ഐപിസി സെക്ഷൻ 452, 354, 509, 34 എന്നിവ പ്രകാരം ഹൗസ് ഖാസ് പൊലീസ് സ്റ്റേഷനിലാണ് കേസ് റജിസ്റ്റർ ചെയ്തത്. വാർഷിക ആഘോഷ പരിപാടികൾക്കിടെ കോളജിൽ അനധികൃതമായി പ്രവേശിച്ച യുവാക്കൾ ശാരീരികമായി ഉപദ്രവിച്ചെന്നാണ് പരാതി.

ഫെബ്രുവരി 6 നായിരുന്നു കോളജിലെ വാർഷികാഘോഷം. ഗേറ്റ് തുറന്നെത്തിയ ഒരു സംഘം ആളുകൾ വിദ്യാർഥിനികളെ കയറിപിടിക്കുകയും അസഭ്യം പറയുകയും ചെയ്യുകയായിരുന്നു. 30–35 വയസ്സിന് ഇടയിലുള്ളവരാണ് ക്യാംപസിനുള്ളിൽ പ്രവേശിച്ച്, ലഹരി ഉപയോഗിക്കുകയും പെൺകുട്ടികളോടു അപമര്യാദയായി പെരുമാറുകയും ചെയ്തത്.

English Summary: Mass Molestation in Gargi College, Delhi Police filed case