വിശ്വാസികളുടെ വികാരം മാനിക്കുന്ന വിധി; എൽഡിഎഫിന് തിരിച്ചടി: ഉമ്മൻ ചാണ്ടി
Mail This Article
തിരുവനന്തപുരം ∙ ശ്രീ പത്മനാഭസ്വാമി ക്ഷേത്രവുമായി ബന്ധപ്പെട്ട സുപ്രീംകോടതി വിധിയെ സ്വാഗതം ചെയ്യുന്നുവെന്ന് മുന് മുഖ്യമന്ത്രി ഉമ്മന് ചാണ്ടി. രാജകുടുംബത്തിന്റെയും വിശ്വാസികളുടെയും വികാരം മാനിക്കുന്ന വിധിയാണിത്. സംസ്ഥാന സര്ക്കാരിന് കനത്ത തിരിച്ചടിയേറ്റെന്നും ഉമ്മന് ചാണ്ടി അഭിപ്രായപ്പെട്ടു.
രാജകുടുംബത്തിന്റെയും വിശ്വാസികളുടെയും അഭിപ്രായം മാനിച്ചുകൊണ്ടാണ് യുഡിഎഫ് സര്ക്കാര് മുന്നോട്ടുപോയത്. ക്ഷേത്രവും ക്ഷേത്രവുമായി ബന്ധപ്പെട്ട വിശ്വാസങ്ങളും ആചാരങ്ങളും ക്ഷേത്രത്തിലെ സമ്പത്തും രാജകുടുംബത്തിന്റെയും വിശ്വാസികളുടെയും കൈകളില് ഭദ്രമായി സൂക്ഷിക്കപ്പെട്ടു. അതിനിയും ഭദ്രമായിരിക്കും. നൂറ്റാണ്ടുകളുടെ പഴക്കമുള്ള, ഒരു ലക്ഷം കോടിയിലധികം മൂല്യമുള്ള സ്വത്തുക്കളാണ് ശ്രീപത്മനാഭ ക്ഷേത്രത്തിലുള്ളത്. ഇതു സംരക്ഷിക്കാന് യുഡിഎഫ് സര്ക്കാര് പഴുതടച്ച സംവിധാനം ഏര്പ്പെടുത്തി.
ഒരു എസ്പിയുടെ നേതൃത്വത്തില് കമാന്ഡോകള് ഉള്പ്പെടെ ഇരുനൂറോളം പൊലീസുകാരെയാണ് 24 മണിക്കൂര് സുരക്ഷയ്ക്ക് ഏര്പ്പെടുത്തിയത്. അവര്ക്ക് ക്ഷേത്രപരിസരത്ത് ക്യാംപ് ഓഫിസ് തുറന്നു. അത്യാധുനിക ക്യാമറ ഉള്പ്പെടയുള്ള നിരീക്ഷണ സംവിധാനം ഏര്പ്പെടുത്തി. ചുറ്റുമുള്ള റോഡുകള് നവീകരിച്ചു. 25 കോടിയിലധികം രൂപ ഇതിനായി ചെലവഴിച്ചു. സുപ്രീംകോടതി വിധിയെ ശബരിമല വിഷയത്തിന്റെ വെളിച്ചത്തില് സ്വാഗതം ചെയ്യാന് ഇടതുസര്ക്കാര് നിര്ബന്ധിതമായെന്നും ഉമ്മന് ചാണ്ടി ചൂണ്ടിക്കാട്ടി.
Content Highlights: Sree Padmanabha Swamy Temple, Supreme Court Verdict on Sree Padmanabha Swamy Temple, Oommen Chandy