എസ്പിബിയുടെ ആരോഗ്യസ്ഥിതി വഷളായി; ‘അതീവ ഗുരുതരം’ എന്ന് ആശുപത്രി
Mail This Article
ചെന്നൈ ∙ ഗായകൻ എസ്.പി.ബാലസുബ്രഹ്മണ്യത്തിന്റെ (എസ്പിബി) ആരോഗ്യസ്ഥിതി മോശമായി. എസ്പിബി ‘അതീവ ഗുരുതരാവസ്ഥയിൽ’ ആണെന്നു ചെന്നൈയിലെ എംജിഎം ആശുപത്രി മെഡിക്കൽ ബുള്ളറ്റിനിൽ അറിയിച്ചു. കോവിഡ് ബാധിച്ച് ഓഗസ്റ്റ് 5 മുതൽ ചികിത്സയിലാണ്. സാധ്യമായ എല്ലാ വൈദ്യ സഹായവും അദ്ദേഹത്തിനു നൽകുന്നുണ്ടെന്ന് ആശുപത്രി വ്യക്തമാക്കി.
ഓഗസ്റ്റ് 13ന് എസ്പിബിയുടെ ശരീരത്തിലെ ഓക്സിജന്റെ അളവ് കുറഞ്ഞിരുന്നു. തുടര്ന്ന് തീവ്രപരിചരണ വിഭാഗത്തില് പ്രവേശിപ്പിച്ചു. വെന്റിലേറ്റര് സഹായം നല്കി. പ്ലാസ്മ തെറപ്പിക്കും വിധേയനായി. പിന്നീട് അദ്ദേഹത്തിന്റെ ആരോഗ്യനില മെച്ചപ്പെട്ടതായി സെപ്റ്റംബര് 19ന് മകന് എസ്.പി.ചരൺ പറഞ്ഞിരുന്നു.
കഴിഞ്ഞ ദിവസങ്ങളിൽ എസ്പിബിയുടെ ആരോഗ്യനില ഭേദമാകുകയും ആശുപത്രിയിൽ വിവാഹ വാർഷികം ആഘോഷിക്കുകയും ചെയ്തിരുന്നു. ആരോഗ്യം നന്നാകുന്നുവെന്നു കാണിച്ച് എസ്പിബി തന്നെ വിഡിയോയും പോസ്റ്റ് ചെയ്തിരുന്നു. എന്നാൽ പെട്ടെന്നു സ്ഥിതി വഷളായി എന്നാണ് ആശുപത്രി അധികൃതർ പറയുന്നത്.
English Summary: Singer SPB's health deteriorates, hospital says he's ‘extremely critical’