കണ്ണൂർ∙ കെപിസിസി പ്രസിഡന്റ് സ്ഥാനം ലക്ഷ്യമിട്ടുള്ള ഫോർമുല പാളിയതോടെ കെ.സുധാകരൻ എംപി അമർഷത്തിൽ. എ.വി.ഗോപിനാഥുമായി തന്റെ മധ്യസ്ഥതയിൽ നടത്തിയ ചർച്ച നേതൃത്വം വേണ്ടത്ര ഗൗരവത്തിലെടുത്തില്ലെന്നതും സുധാകരനെ ചൊടിപ്പിച്ചു. രണ്ടുദിവസത്തിനകം പ്രശ്നപരിഹാരമെന്ന ഉറപ്പാണു സുധാകരൻ ഗോപിനാഥിനു നൽകിയതെങ്കിലും ആ സമയപരിധിക്കുള്ളിൽ നേതൃത്വത്തിന്റെ ഇടപെടലുണ്ടായില്ല. ഡൽഹിയിലുള്ള നേതാക്കളെ ബന്ധപ്പെട്ട് സുധാകരൻ അതൃപ്തി അറിയിച്ചെന്നാണു വിവരം. തുടർച്ചയായി രാഷ്ട്രീയ തിരിച്ചടികളുണ്ടാകുന്നതിന്റെ നിരാശ വരും ദിവസങ്ങളിൽ സുധാകരന്റെ നീക്കങ്ങളിൽ പ്രതിഫലിച്ചേക്കാം.
