രക്തം കട്ടപിടിക്കുന്നു; ഓക്സ്ഫഡ് വാക്സീൻ കുട്ടികളിൽ പരീക്ഷിക്കുന്നത് നിർത്തി
Mail This Article
ലണ്ടൻ∙ അസ്ട്രാസെനക്കയും ഓക്സ്ഫഡ് സർവകലാശാലയും ചേർന്ന് വികസിപ്പിച്ച കൊറോണ വൈറസ് വാക്സീൻ കുട്ടികളിൽ പരീക്ഷിക്കുന്നത് നിർത്തിവച്ചു. രക്തം കട്ടപിടിക്കുന്നത് നിരീക്ഷിക്കുന്നതിനാണ് പരീക്ഷണം താൽകാലികമായി നിർത്തിവച്ചതെന്ന് ഓക്സ്ഫഡ് സർവകലാശാല അധികൃതർ അറിയിച്ചു.
അതേസമയം, വാക്സീന്റെ സുരക്ഷയുമായി ബന്ധപ്പെട്ടു യാതൊരു ആശങ്കയുമില്ലെന്നും അധികൃതർ അറിയിച്ചു. മുതിർന്നവരിൽ രക്തം കട്ടപിടിക്കുന്നതുമായി ബന്ധപ്പെട്ടു ചുരുക്കം സംഭവങ്ങളിൽ എംഎച്ച്ആർഎയുടെ വിശദീകരണത്തിനായി കാത്തിരിക്കുകയാണ്. കുട്ടികൾക്കും മുതിർന്നവർക്കും പരീക്ഷണശാലകൾ സന്ദർശിക്കുന്നതും സംശയങ്ങൾ ദുരീകരിക്കുന്നതും തുടരാമെന്നും അധികൃതർ അറിയിച്ചു.
യൂറോപ്പിലെ ചില രാജ്യങ്ങളിൽ വാക്സീൻ സ്വീകരിച്ച ചുരുക്കംപേരിൽ രക്തം കട്ടപിടിക്കുന്നത് റിപ്പോർട്ട് ചെയ്തിരുന്നു. വാക്സീനും രക്തം കട്ടപിടിക്കുന്നതും തമ്മിൽ ബന്ധമുണ്ടോ എന്ന് ബ്രിട്ടന്റെ മെഡിസിൻ ആൻഡ് ഹെൽത്ത്കെയർ പ്രൊഡക്ട്സ് റെഗുലേറ്ററി ഏജൻസി (എംഎച്ച്ആർഎ) നിരീക്ഷിക്കുകയാണ്. ലോകാരോഗ്യ സംഘടനയും യൂറോപ്യൻ മെഡിസിൻ ഏജൻസിയും (ഇഎംഎ)യും ചേർന്ന് പഠന വിവരങ്ങൾ ഈ ആഴ്ച പുറത്തുവിടും.
Content Highlights: AstraZeneca UK Vaccine trial in children paused