പൊലീസിനു നേരെ ബോംബേറ്; പ്രതി രക്ഷപ്പെടുന്ന ദൃശ്യങ്ങൾ പുറത്ത്

തിരുവനന്തപുരം∙ കിള്ളിപ്പാലത്ത് പൊലിസിനു നേരെ ബോംബെറിഞ്ഞ പ്രതിയുടെ സിസിടിവി ദൃശ്യം പുറത്ത്. ഹോട്ടലിന്റെ മൂന്നാം നിലയില്‍ നിന്ന് ചാടി രക്ഷപ്പെട്ട പ്രതിയുടേതാണ് ദൃശ്യം. ആന്‍റിനാര്‍ക്കോട്ടിക് സ്ക്വാഡിലെ പൊലീസുകാര്‍ക്കുനേരെ നാടന്‍ ബോംബെറിഞ്ഞ പ്രതികള്‍ ലോഡ്ജിന്‍റെ മൂന്നാം നിലയില്‍ നിന്ന് താഴേക്കുചാടി രക്ഷപെട്ടിരുന്നു. രണ്ടുപേരെ കസ്റ്റഡിയിലെടുത്തു. അഞ്ചു കിലോ കഞ്ചാവും മൂന്ന് തോക്കുകളും വാളുകളും പിടിച്ചെടുത്തു. 

പ്രതി ഷർട്ട് ധരിച്ചിരുന്നില്ല. ബോംബെറിഞ്ഞ ശേഷം ഒരു കടയിൽ ഒളിക്കാൻ ശ്രമിച്ചെങ്കിലും കടക്കാരൻ അനുവദിച്ചില്ല. തുടർന്ന് ഓട്ടോ സ്റ്റാൻഡിൽ എത്തി പേരൂർക്കട ഭാഗത്തേക്ക് പോകണമെന്ന് പറഞ്ഞെങ്കിലും അസ്വഭാവികത തോന്നിയതിനെ തുടർന്ന് ഓട്ടോ ഡ്രൈവര്‍ വിസമ്മതിച്ചു. ഇതോടെ പ്രതി അവിടെനിന്നും ഓടി രക്ഷപ്പെടുകയായിരുന്നു. ഇതിന്റെ വീഡിയോയാണ് ഇപ്പോൾ പുറത്തുവന്നിരിക്കുന്നത്.

English Summary: bomb attack on police