ഗൂഢാലോചന കേസ്: ഹൈക്കോടതിയിൽ റിപ്പോര്ട്ട് സമര്പ്പിച്ച് അന്വേഷണസംഘം
Mail This Article
കൊച്ചി∙ നടിയെ പീഡിപ്പിച്ച കേസ് അന്വേഷിച്ച പൊലീസ് ഉദ്യോഗസ്ഥരെ കൊലപ്പെടുത്താൻ നടൻ ദിലീപ് ഗൂഢാലോചന നടത്തിയെന്ന കേസിൽ അന്വേഷണ സംഘം ഹൈക്കോടതിയിൽ അന്വേഷണ റിപ്പോര്ട്ട് സമര്പ്പിച്ചു. മൂന്നു ദിവസം പ്രതികളെ ചോദ്യം ചെയ്തതിന്റെ വിശദാംശങ്ങളും ഡിജിറ്റല് തെളിവുകളുമാണ് റിപ്പോര്ട്ടിലുള്ളത്. മുദ്രവച്ച കവറിലാണ് റിപ്പോര്ട്ട് സമര്പ്പിച്ചത്.
കേസിൽ പ്രതികളുടെ മുൻകൂർ ജാമ്യഹർജി ഹൈക്കോടതി ബുധനാഴ്ചത്തേക്ക് മാറ്റിയിരുന്നു. ബുധനാഴ്ച വരെ അറസ്റ്റ് ചെയ്യുന്നതിനു വിലക്കുണ്ട്. പ്രോസിക്യൂഷൻ ആവശ്യപ്പെട്ടതിനെ തുടർന്നാണ് നടപടി. ഡിജിറ്റൽ തെളിവുകളുടെ വിശകലനത്തിന് കൂടുതൽ സമയം വേണമെന്ന് പ്രോസിക്യൂഷൻ അറിയിച്ചു.
അന്വേഷണ റിപ്പോർട്ടിന്റെ അടിസ്ഥാനത്തിലാകും മുൻകൂർ ജാമ്യഹർജിയിൽ തീരുമാനമെടുക്കുക. ദിലീപിനും ക്രൈംബ്രാഞ്ച് സംഘത്തിനും ഒരുപോലെ നിര്ണായകമാണ് അന്വേഷണ പുരോഗതി റിപ്പോര്ട്ട്. മൂന്നു ദിവസം, 33 മണിക്കൂര് നീണ്ടുനിന്ന ചോദ്യം ചെയ്യലിന്റെ വിവരങ്ങളടക്കമാണ് റിപ്പോര്ട്ടിലുള്ളത്.
English Summary: Conspiracy case Against Dileep: Report Submitted at High Court