കണ്ണൂരിൽ വീടിന്റെ ബീം തകർന്ന് വീട്ടുടമയും നിർമാണ തൊഴിലാളിയും മരിച്ചു
Mail This Article
കണ്ണൂർ∙ നിർമാണത്തിലിരിക്കുന്ന വീടിന്റെ ബീമും സൺഷേഡും തകർന്ന് വീണ് ഗൃഹനാഥനും തൊഴിലാളിയും മരിച്ചു. ചക്കരക്കല്ലിന് സമീപം പള്ളിപ്പൊയിൽ ചാത്തോത്തുകുളം ആറ്റടപ്പ റോഡിൽ മാരാങ്കലത്ത് ഹൗസിൽ മുണ്ടാണി കൃഷ്ണൻ (59), നിർമാണ തൊഴിലാളി കൊറ്റാളി അംബേദ്കർ കോളനിയിലെ അരിങ്ങാലയൻ ഹൗസിൽ പി.ജി.ലാലൻ (43) എന്നിവരാണ് മരിച്ചത്.
വീടിന്റെ ഒന്നാം നില നിര്മിക്കുന്നതിനു വേണ്ടിയുള്ള നിർമാണ പ്രവർത്തനത്തിനിടെ തിങ്കളാഴ്ച ഉച്ചയ്ക്ക് 2നാണ് സംഭവം. ബീമിന്റെയും സൺഷേഡിന്റെയും താങ്ങ് വച്ച ഇരുമ്പ് തൂൺ നീക്കവെയാണ് അപകടം. ലാലൻ സംഭവസ്ഥലത്തും കൃഷ്ണൻ കണ്ണൂരിലെ സ്വകാര്യ ആശുപത്രിയിലും മരിച്ചു.
വസന്തയാണ് കൃഷ്ണന്റെ ഭാര്യ. മക്കൾ: വിജേഷ്, വിനീഷ്, വിനിഷ. മരുമകൻ: മഞ്ജുനാഥ്. കൊറ്റാളി അംബേദ്കർ കോളനിയിലെ അരിങ്ങാലയൻ ഹൗസിൽ പരേതനായ അലക്സാണ്ടറിന്റെയും ശാന്തയുടെയും മകനാണ് ലാലൻ (43). സഹോദരങ്ങൾ: വിനീത, നെൽസൺ, സലൻ, ലിസി.
English Summary: Under-Construction Building Collapses In Kannur