ബറാക് ഒബാമയുടെ വലിയ നേട്ടവും ഡോണൾഡ് ട്രംപിന്റെ വലിയ കോട്ടവുമായി ലോകം വിലയിരുത്തുന്ന ഒന്നാണ് ഇറാൻ ആണവക്കരാർ. ഒബാമയുടെയും ട്രംപിന്റെയും പിൻഗാമിയായി യുഎസ് പ്രസിഡന്റ് സ്ഥാനത്തെത്തിയ ജോ ബൈഡനു മുന്നിലുള്ള കടുത്ത വെല്ലുവിളിയും ഇതേ ആണവക്കരാറാണ്. ഇറാനുമായുള്ള ആണവക്കരാർ ഒബാമ യാഥാർഥ്യമാക്കിയപ്പോൾ, വർഷങ്ങൾക്കിപ്പുറം അതു റദ്ദാക്കിയാണു ട്രംപ് ‘ചരിത്രം’ കുറിച്ചത്. ഒരു വർഷത്തിലേറെയായി ആ ആണവക്കരാറിന്റെ പുനരുജ്ജീവന നടപടികളിലാണു ബൈഡൻ.
