കുറ്റകൃത്യത്തെക്കുറിച്ച് അറിയില്ല: മുന്‍കൂര്‍ ജാമ്യം തേടി ഷൈബിന്റെ ഭാര്യ ഹൈക്കോടതിയിൽ

കൊച്ചി∙ മൈസൂരു സ്വദേശിയായ പാരമ്പര്യ വൈദ്യൻ ഷാബാ ഷരീഫിന്റെ കൊലപാതകവുമായി ബന്ധപ്പെട്ട് അറസ്റ്റിലായ ഷൈബിന്‍ അഷ്റഫിന്റെ ഭാര്യ ഹൈക്കോടതിയില്‍ മുന്‍കൂര്‍ ജാമ്യാപേക്ഷ നല്‍കി. അന്വേഷണവുമായി സഹകരിക്കുന്നുണ്ടെന്നും കുറ്റകൃത്യത്തെക്കുറിച്ച് അറിയില്ലെന്നും ഷൈബിന്റെ ഭാര്യ ഫസ്ന ഹർജിയിൽ വ്യക്തമാക്കി. ഷൈബിനെ സഹായിച്ചതായി ആരോപണമുയർന്ന മുൻ എഎസ്ഐ സുന്ദരനും മുന്‍കൂര്‍ ജാമ്യാപേക്ഷ നല്‍കിയിട്ടുണ്ട്. ഇരുവരുടെയും മുൻകൂർ ജാമ്യാപേക്ഷയിൽ ഹൈക്കോടതി സർക്കാരിന്റെ നിലപാടു തേടി. ജാമ്യാപേക്ഷ കോടതി ഒരാഴ്ചയ്ക്കു ശേഷം വീണ്ടും പരിഗണിക്കുന്നതിനായി മാറ്റിവച്ചു.

ഒറ്റമൂലി രഹസ്യം ലഭിക്കാനായി മൈസൂരു സ്വദേശിയായ പാരമ്പര്യ വൈദ്യൻ ഷാബാ ഷരീഫിനെ കൊന്നു കഷ്ണങ്ങളാക്കി പുഴയിലെറിഞ്ഞ കേസിലെ മുഖ്യ പ്രതിയാണ് ഷൈബിന്‍ അഷ്റഫ്. ഷാബാ ഷരീഫിനെ ഒരു വർഷത്തിലേറെ തടങ്കലിൽ പാർപ്പിച്ചതിനു ശേഷമാണ് കൊലപ്പെടുത്തിയത്.

English Summary : Shaba Sherif murder : Shybin Ashraf's wife seeks anticipatory bail for her husband