ദേശീയ തിരഞ്ഞെടുപ്പ്: ഓസ്ട്രേലിയൻ പ്രധാനമന്ത്രി സ്കോട്ട് മോറിസന് തോൽവി

സിഡ്നി∙ ഓസ്ട്രേലിയയിൽ ഭരണമാറ്റം ഉറപ്പാക്കി പൊതുതിരഞ്ഞെടുപ്പു ഫലം. തിരഞ്ഞെടുപ്പു ഫലം പൂർണമായും പുറത്തുവരും മുൻപേ ലിബറൽ പാർട്ടി നേതാവു കൂടിയായ നിലവിലെ പ്രധാനമന്ത്രി സ്കോട്ട് മോറിസൻ പരാജയം സമ്മതിച്ചു. ഇതോടെ, ലേബർ പാർട്ടി നേതാവ് ആന്തണി അൽബനീസിന്റെ നേതൃത്വത്തിൽ പുതിയ സർക്കാർ അധികാരത്തിലെത്തും.

‘നിലവിലെ പ്രതിപക്ഷ നേതാവും അടുത്ത പ്രധാനമന്ത്രിയുമായ ആന്തണി അൽബനീസുമായി രാത്രി ഞാൻ സംസാരിച്ചിരുന്നു. തിരഞ്ഞെടുപ്പു വിജയത്തിൽ അദ്ദേഹത്തെ അഭിനന്ദനമറിയിച്ചു’ – സ്കോട്ട് മോറിസൻ സിഡ്നിയിൽ പറഞ്ഞു. തിരഞ്ഞെടുപ്പു തോൽവിയുടെ പശ്ചാത്തലത്തിൽ ലിബറൽ പാർട്ടി നേതൃസ്ഥാനവും രാജിവയ്ക്കുമെന്ന് മോറിസൻ അറിയിച്ചു.

English Summary: Australian prime minister concedes defeat in election