യുക്രെയ്ൻ യുദ്ധത്തിലൂടെ നാശമല്ലാതെ എന്തെങ്കിലും നേട്ടങ്ങൾ ആർക്കെങ്കിലുമുണ്ടായോ? ഈ ചോദ്യത്തിന് വൈരത്തിളക്കമുള്ളൊരു ചിരിയിലൂടെ ഉത്തരം നൽകാൻ തയാറെടുക്കുകയാണു തൃശൂരിലെ പോന്നോർ എന്ന ഗ്രാമം. യുക്രെയ്ൻ യുദ്ധവും പോന്നോരും തമ്മിൽ എന്തു ബന്ധമെന്നു ചോദിക്കും മുൻപു പോന്നോര്‍ നിവാസികളുടെ കുടിൽ വ്യവസായം എന്താണെന്ന് അറിഞ്ഞിരിക്കുന്നതു നന്നായിരിക്കും. വജ്രാഭരണ നിർമാണത്തിൽ ദക്ഷിണേന്ത്യയിലെ ഏക ‘ഹബ്’ ആണു പോന്നോർ. ആകൃതിയില്ലാത്ത വൈരക്കല്ലുകൾ (റഫ് ഡയമണ്ട്) മുറിച്ചും ഉരച്ചും ആഭരണ നിർമാണത്തിനു പാകപ്പെടുത്തുന്ന ഗ്രാമം. ഈ രംഗത്തെ കുത്തക കൈവശം വയ്ക്കുന്നതു ഗുജറാത്തിലെ സൂറത്ത് നഗരമാണ്. ലോകത്താകെ ആഭരണ നിർമാണത്തിനായി ഉപയോഗിക്കുന്ന 90% വജ്രവും ചെത്തിയൊരുക്കുന്ന സൂറത്തിന് ഏതാനും മാസങ്ങളായി കഷ്ടകാലമാണ്. യുക്രെയ്ൻ യുദ്ധം തുടങ്ങിയതോടെ വജ്രത്തിന്റെ വരവു നിലച്ചു. ആയിരക്കണക്കിന് ആളുകൾക്കു തൊഴിൽ നഷ്ടപ്പെട്ടു. ഇതൊരു അവസരമാക്കാൻ ഒരുങ്ങുകയാണു പോന്നോർ.
