മുല്ലപ്പെരിയാറിൽ ആശങ്കപ്പെടേണ്ടതില്ല; അണക്കെട്ട് എല്ലാ അർഥത്തിലും സുരക്ഷിതം: എം.കെ.സ്റ്റാലിൻ

ചെന്നൈ ∙ മുല്ലപ്പെരിയാർ അണക്കെട്ടു വിഷയത്തിൽ കേരള മുഖ്യമന്ത്രി പിണറായി വിജയന്റെ കത്തിനു മറുപടിയുമായി തമിഴ്നാട് മുഖ്യമന്ത്രി എം.കെ.സ്റ്റാലിൻ. മുല്ലപ്പെരിയാറിന്റെ നിലവിലെ സ്ഥിതിയിൽ ആശങ്കപ്പെടേണ്ടതില്ല. അണക്കെട്ട് എല്ലാ അർഥത്തിലും സുരക്ഷിതമാണെന്നും റൂൾ കർവ് അനുസരിച്ചാണു ജലനിരപ്പു നിയന്ത്രിക്കുന്നതെന്നും എം.കെ.സ്റ്റാലിൻ കത്തിൽ പറഞ്ഞു.

അണക്കെട്ടും അണക്കെട്ടിലേക്കുള്ള വെള്ളത്തിന്റെ ഒഴുക്കും സൂക്ഷ്മമായി നിരീക്ഷിക്കുന്നുണ്ട്. നിലവില്‍ വൃഷ്ടിപ്രദേശത്ത് അണക്കെട്ടിന്റെ താഴ്ഭാഗത്തുള്ളതിനേക്കാള്‍ മഴ കുറവാണ്. വൈഗ അണക്കെട്ടിലേക്ക് അധികജലം കൊണ്ടുപോയി റൂള്‍ കര്‍വ് പാലിക്കുന്നുണ്ട്. അണക്കെട്ടിന് താഴെ താമസിക്കുന്നവരുടെ സുരക്ഷ ഉറപ്പാക്കാൻ വേണ്ട നടപടികൾ അണക്കെട്ട് മാനേജ്മെന്റ് സംഘം ചെയ്തിട്ടുണ്ട്.

മുന്നറിയിപ്പില്ലാതെ അണക്കെട്ടു തുറന്നു ജലം ഒഴുക്കില്ല. കേരളത്തിലെ ഉദ്യോഗസ്ഥരുമായി നിരന്തരം ഇക്കാര്യങ്ങൾ ചർച്ച ചെയ്യുന്നുണ്ടെന്നും തുടർച്ചയായ ആശയവിനിമയം ഉറപ്പാക്കണമെന്നും നിർദേശം നൽകിയിട്ടുണ്ടെന്നും പിണറായി വിജയന്റെ കത്തിനുള്ള മറുപടിയില്‍ തമിഴ്നാട് മുഖ്യമന്ത്രി എം.കെ.സ്റ്റാലിന്‍ പറഞ്ഞു.

മുല്ലപ്പെരിയാർ മേഖലയിൽ തീവ്രമഴ പെയ്യുന്ന സാഹചര്യത്തിൽ കൂടുതൽ ജലം കൊണ്ടു പോകണമെന്നും അണക്കെട്ടിന്റെ കാര്യത്തിൽ അടിയന്തര ഇടപെടൽ നടത്തണമെന്നും ആവശ്യപ്പെട്ടായിരുന്നു പിണറായി തമിഴ്നാടിനു കത്തയച്ചത്. 

English Summary: MK Stalin's reply to Pinarayi Vijayan regarding Mullaperiyar Dam