തെലങ്കാന പൊലീസിനൊപ്പം തുറന്ന ജീപ്പിൽ ദുൽഖറിന്റെ സ്വാതന്ത്ര്യദിനാഘോഷം– വിഡിയോ

ഹൈദരാബാദ് ∙ തെലങ്കാനയിലെ സൈബരാബാദിൽ പൊലീസ് ഉദ്യോഗസ്ഥർക്കൊപ്പം 75–ാം സ്വാതന്ത്ര്യദിനം ആഘോഷിച്ച് നടൻ ദുൽഖർ സൽമാൻ. തെലങ്കാന പൊലീസിനൊപ്പം സ്വാതന്ത്ര്യദിനം ആഘോഷിക്കുന്ന വിഡിയോ ദുൽഖർ സമൂഹമാധ്യമങ്ങളിൽ പങ്കുവച്ചു.

സ്വാതന്ത്ര്യദിനാശംസകൾ നേർന്നു പങ്കുവച്ച വിഡിയോയിൽ താരം തുറന്ന ജീപ്പിൽ പരേഡ് വീക്ഷിക്കുന്നതും പതാക ഉയർത്തുന്നതും കാണാം. സ്വാതന്ത്ര്യദിനം അവിസ്മരണീയമാക്കിയതിന് സൈബരാബാദ് മെട്രോപൊലീറ്റൻ പൊലീസിന് ദുൽഖർ നന്ദി പറഞ്ഞിട്ടുണ്ട്.

ദുൽഖർ നായകനായി അഭിനയിച്ച ‘സീതാരാമം’ എന്ന തെലുങ്കു ചിത്രം തിയറ്ററുകളിൽ മികച്ച പ്രതികരണമുണ്ടാക്കി മുന്നേറുന്നതിനിടെയാണ് തെലങ്കാന പൊലീസിനൊപ്പം താരം സ്വാതന്ത്ര്യദിനം ആഘോഷിച്ചത്.

English Summary: Dulquer Salmaan Celebrates Independence Day With Cyberabad Police