കൊല്ലം∙ കൊട്ടാരക്കര മൈലത്ത് ലോറി വീട്ടിലേക്കു മറിഞ്ഞതിൽ വീട്ടുകാർക്ക് നഷ്ടപരിഹാരം നൽകുമെന്ന് ലോറി ഉടമ. അപകടമുണ്ടായി അഞ്ചു ദിവസമായിട്ടും ലോറി മാറ്റാത്തതു വിമർശനമായതോടെയാണു തീരുമാനം. മൈലം സ്വദേശി രാമചന്ദ്രൻ പിള്ളയുടെ വീടാണ് അപകടത്തിൽ തകർന്നത്.
അഞ്ചുദിവസം മുൻപാണ് മൈലം സ്വദേശി രാമചന്ദ്രൻ പിള്ളയുടെ വീടിനു മുകളിലേക്കു കോൺക്രീറ്റ് മിശ്രിതവുമായി വന്ന ലോറി മറിഞ്ഞത്. കയറ്റം കയറുന്നതിനിടെ ലോറി പിന്നിലേക്ക് ഉരുണ്ടാണ് അപകടമുണ്ടായത്. മുൻഭാഗത്തെ ഭിത്തിയും കോൺക്രീറ്റ് ഷെയ്ഡും ഉൾപ്പെടെ തകർത്ത് ലോറി വീട്ടിനുള്ളിലേക്കു പതിച്ചു.
അഞ്ചു ദിവസമായിട്ടും ലോറി മാറ്റാൻ വാഹന ഉടമ തയാറായിരുന്നില്ല. ഇതു പരാതിക്കിടയായതോടെ കെ.ബി.ഗണേഷ് കുമാർ എംഎൽഎ ഇടപെട്ടു. ലോറി ഉടമയുമായി നടത്തിയ ചർച്ചയിൽ വീടിന്റെ അറ്റകുറ്റപ്പണി നടത്താമെന്ന് ലോറി ഉടമ സമ്മതിച്ചു. അടൂരിൽനിന്നു കുന്നിക്കോട് ഭാഗത്തേക്ക് കോൺക്രീറ്റ് മിശ്രിതവുമായി പോയപ്പോഴായിരുന്നു കഴിഞ്ഞ ദിവസം അപകടമുണ്ടായത്.
English Summary: Lorry owner promised to give compensation after KB Ganesh Kumar
