നിസ്വാർഥ സേവകൻ, ഏറെ വേദനയും ദുഃഖവും; കോടിയേരിയെപ്പറ്റി യൂസഫലി

കൊച്ചി ∙ കേരള രാഷ്ട്രീയ രംഗത്തെ നിസ്വാർഥ സേവകനായിരുന്നു കോടിയേരി ബാലകൃഷ്ണനെന്നു ലുലു ഗ്രൂപ്പ് ചെയർമാൻ എം.എ.യൂസഫലി അനുശോചന സന്ദേശത്തിൽ പറഞ്ഞു. അദ്ദേഹത്തിന്റെ നിര്യാണം ഏറെ വേദനയോടും ദുഃഖത്തോടെയുമാണു ശ്രവിച്ചത്. നിയമസഭാ സാമാജികൻ, പ്രതിപക്ഷ ഉപനേതാവ്, മന്ത്രി, പാർട്ടി സെക്രട്ടറി എന്നീ നിലകളിൽ അദ്ദേഹത്തിന്റെ പ്രവർത്തനം ഏറെ ശ്രദ്ധേയമായിരുന്നു.  

ദീർഘകാലമായുള്ള സഹോദര ബന്ധവും കുടുംബ ബന്ധവുമായിരുന്നു അദ്ദേഹവുമായി ഉണ്ടായിരുന്നത്. രണ്ട് മാസം മുൻപു തിരുവനന്തപുരത്ത് അദ്ദേഹവുമായി സംസാരിച്ചത് ഈ അവസരത്തിൽ ഓർമിക്കുന്നു. സംസ്ഥാന ആഭ്യന്തര മന്ത്രിയായിരിക്കെ അബുദാബി പൊലീസ് ആസ്ഥാനം സന്ദർശിക്കുകയും അവരുമായി ചേർന്നുള്ള സംയുക്ത പ്രവർത്തനങ്ങൾക്ക് തുടക്കമിട്ടതും ഓർമയിലുണ്ട്. അദ്ദേഹത്തിന്റെ നിര്യാണത്തിൽ അഗാധമായ ദുഃഖം രേഖപ്പെടുത്തുന്നു.

English Summary: MA Yusuf Ali remembers Kodiyeri Balakrishnan