ബിഹാറിൽ മദ്യ കള്ളക്കടത്തുകാർ എക്സൈസ് ഉദ്യോഗസ്ഥനെ നദിയിൽ മുക്കിക്കൊന്നു

പട്ന∙ മദ്യ കള്ളക്കടത്തുകാർ എക്സൈസ് ഉദ്യോഗസ്ഥനെ നദിയിൽ മുക്കിക്കൊന്നു. മുസഫർപുർ ജില്ലയിലെ മുഷാഹരിയിലാണ് സംഭവം. ബുഡി ഗണ്ഡക് നദിക്കരയിൽ രണ്ടു മദ്യ കള്ളക്കടത്തുകാരെ പിന്തുടർന്നു പിടികൂടിയ എക്സൈസ് കോൺസ്റ്റബിൾ ദീപക് കുമാറിനെയാണ് (23) മൽപിടിത്തത്തിനിടെ നദിയിൽ മുക്കിക്കൊലപ്പെടുത്തിയത്. കൊല നടത്തിയ രണ്ടു പേർ ഒളിവിലാണ്.

ദീപക് കുമാറിനൊപ്പം റെയ്ഡിനു പോയ രണ്ടു പൊലീസുകാർ ഓടിയെത്തുന്നതിനു മുൻപു തന്നെ ഇരുവരും ചേർന്ന് കൊല നടത്തിയെന്നാണ് പൊലീസ് പറയുന്നത്. മദ്യ നിരോധന നിയമം നിലവിലുള്ള ബിഹാറിൽ വിഷമദ്യ ദുരന്തങ്ങളെ തുടർന്ന് പൊലീസ്, എക്സൈസ് വിഭാഗങ്ങൾ റെയ്ഡുകൾ ഊർജിതമാക്കിയിരുന്നു. 

English Summary: Liquor mafia drown excise staffer in Bihar river during raid