പ്രതിരോധവും ജാഗ്രതയും വർധിപ്പിക്കണം; സാംപിളുകൾ ജനിതക ശ്രേണീകരണം നടത്തണം: പ്രധാനമന്ത്രി
![PM Modi Covid meeting | Photo: ANI, Twitter പ്രധാനമന്ത്രി നരേന്ദ്ര മോദിയുടെ നേൃത്വത്തിൽ ചേർന്ന ഉന്നത തല യോഗത്തിൽ നിന്ന്. (ചിത്രം: എഎൻഐ, ട്വിറ്റർ)](https://img-mm.manoramaonline.com/content/dam/mm/mo/news/just-in/images/2023/3/22/pm-modi-covid-meeting-1.jpg?w=1120&h=583)
Mail This Article
ന്യൂഡൽഹി∙ രാജ്യത്ത് കോവിഡ് കേസുകൾ വർധിക്കുന്ന സാഹചര്യത്തിൽ പ്രതിരോധവും ജാഗ്രതയും വർധിപ്പിക്കാൻ പ്രധാനമന്ത്രി നരേന്ദ്ര മോദിയുടെ നിർദേശം. മാസ്ക് ധരിക്കുന്നതിന് പ്രാമുഖ്യം നൽകണമെന്നും സാംപിളുകൾ ജനിതക ശ്രേണീകരണം നടത്തണമെന്നും പ്രധാനമന്ത്രി നിർദേശിച്ചു.
കോവിഡ് തയാറാടെപ്പുകൾ അവലോകനം ചെയ്യുന്നതിനായി ഇന്നു വൈകിട്ട് മുതിർന്ന ഉദ്യോഗസ്ഥരുമായി നടത്തിയ ഉന്നതല തല യോഗത്തിലാണ് പ്രധാനമന്ത്രിയുടെ നിർദേശം. ടെസ്റ്റ്–ട്രാക്ക്–ട്രീറ്റ്–വാക്സിനേഷൻ, കോവിഡ് ഉചിത പെരുമാറ്റം എന്നീ കാര്യങ്ങളിൽ ശ്രദ്ധ കേന്ദ്രീകരിക്കേണ്ടതിന്റെ ആവശ്യകത പ്രധാനമന്ത്രി ചൂണ്ടിക്കാട്ടി. മരുന്നുകള് ഉൾപ്പെടെയുള്ളവയുടെ ലഭ്യത അധികൃതർ ഉറപ്പാക്കണമെന്നും പ്രധാനമന്ത്രി നിർദേശിച്ചു.
രാജ്യത്ത് 1,134 കേസുകളാണ് പുതുതായി റിപ്പോര്ട്ട് ചെയ്തത്. ഇതോടെ ആകെ രോഗികളുടെ എണ്ണം 7,026 ആയതായി കേന്ദ്ര ആരോഗ്യമന്ത്രാലയം അറിയിച്ചു. അഞ്ച് പേര് രോഗബാധിതരായി മരിച്ചു. ഇതോടെ കോവിഡ് ബാധിച്ച് രാജ്യത്ത് ആകെ മരിച്ചവരുടെ എണ്ണം 5,30,813 ആയി.
∙ സംസ്ഥാനത്ത് കനത്ത ജാഗ്രതാ നിർദേശം
സംസ്ഥാനത്ത് എല്ലാ ജില്ലകളിലും ആരോഗ്യമന്ത്രി വീണാ ജോർജ് കനത്ത ജാഗ്രതാ നിർദേശം നൽകിയിട്ടുണ്ട്. ഐസിയു, വെന്റിലേറ്റർ സൗകര്യങ്ങൾ സജ്ജമാക്കാൻ ആശുപത്രികൾക്ക് നിർദേശം നൽകിയിട്ടുണ്ട്. ചൊവ്വാഴ്ച 172 കേസുകളാണ് കേരളത്തിൽ റിപ്പോർട്ട് ചെയ്തത്. ഏറ്റവും കൂടുതൽ കേസുകൾ തിരുവനന്തപുരം, എറണാകുളം ജില്ലകളിലാണ്.
പുതിയ വകഭേദം വന്നിട്ടുണ്ടോയെന്നറിയാന് ജിനോമിക് പരിശോധനകള് വര്ധിപ്പിക്കും. മെഡിക്കല് കോളജുകളില് കോവിഡ് രോഗികളുടെ എണ്ണം കൂടിയിട്ടില്ല. ആവശ്യമായ പരിശോധന കിറ്റുകളും മരുന്നുകളും സജ്ജമാക്കാന് കെഎംഎസ്സിഎല്ലിന് നിര്ദേശം നല്കിയിട്ടുണ്ട്. മറ്റ് രോഗമുള്ളവരും, പ്രായമായവരും, കുട്ടികളും, ഗര്ഭിണികളും പ്രത്യേകം ശ്രദ്ധിക്കണം. അവര് പൊതുസ്ഥലങ്ങളില് പോകുമ്പോള് മാസ്ക് കൃത്യമായി ധരിക്കണം. ആശുപത്രികളില് എത്തുന്നവരെല്ലാവരും നിര്ബന്ധമായും മാസ്ക് ധരിക്കണമെന്നും ആരോഗ്യമന്ത്രി അറിയിച്ചിട്ടുണ്ട്.
English Summary: PM Advises Precaution, Increasing Genome Sequencing As Covid Cases Rise