വിഭാഗീയ പ്രവർത്തനം; പി.കെ.ശശിയെ തരംതാഴ്ത്തി സിപിഎം

പാലക്കാട് ∙ മുതിർന്ന നേതാവും മുൻ എംഎൽഎയുമായ പി.കെ.ശശിയെ സിപിഎം തരംതാഴ്ത്തി. പാലക്കാട് ജില്ലാ സെക്രട്ടേറിയറ്റിൽനിന്ന് ഒഴിവാക്കിയ ശശിയെ ജില്ലാ കമ്മിറ്റിയിലേക്കാണു തരം താഴ്ത്തിയത്. ജില്ലയിലെ വിഭാഗീയ പ്രവർത്തനങ്ങളെ തുടർന്നാണു നടപടി. നിലവിൽ കെടിഡിസി ചെയർമാനാണ് ഇദ്ദേഹം.

സിപിഎം സംസ്ഥാന സെക്രട്ടറി എം.വി.ഗോവിന്ദൻ പങ്കെടുത്ത യോഗത്തിലാണു തീരുമാനം. ശശിക്കെതിരായ പാർട്ടി ഫണ്ട് തിരിമറി പരാതിയിൽ നടപടി പിന്നീട് സ്വീകരിക്കും. ശശിക്കെതിരെ വീണ്ടും അന്വേഷണം നടത്താൻ സംസ്ഥാന സെക്രട്ടേറിയറ്റ് അംഗം പുത്തലത്ത് ദിനേശനെ സിപിഎം മുൻപ് ചുമതലപ്പെടുത്തിയിരുന്നു. ശശിക്കെതിരെ ഉയർന്ന ആരോപണങ്ങൾ പ്രാദേശിക ഘടകം പരിശോധിക്കട്ടെ എന്ന നിലപാടാണ് ആദ്യം സംസ്ഥാന നേതൃത്വം സ്വീകരിച്ചിരുന്നത്.

English Summary: CPM take action against PK Sasi