‘അമേഠിയിലെ ജനങ്ങളെ ഗാന്ധി കുടുംബം കണ്ടത് ‘ച്യുയിംഗം’ പോലെ; ജനങ്ങൾ ക്ഷമിക്കില്ല’

ലക്നൗ∙ അമേഠിയിലെ ജനങ്ങളെ ഗാന്ധി കുടുംബം ‘ച്യുയിംഗം’ പോലെയാണ് കണ്ടതെന്ന് ബിജെപി നേതാവ് മുക്താർ അബ്ബാസ് നഖ്‌വി. മണ്ഡലം അവരുടെ സ്വകാര്യ സ്വത്തു പോലെയാണ് കോൺഗ്രസ് കാണുന്നതെന്നും അദ്ദേഹം പറഞ്ഞു.

‘‘കുടുംബത്തിലെ സ്വകാര്യ സ്വത്തു പോലെയാണ് കോൺഗ്രസ് അമേഠിയെ കാണുന്നത്. അമേഠിയിലെ ജനങ്ങളെ ച്യുയിംഗം പോലെ ചവച്ചു. കുടുംബസ്വത്തു പോലെ ലഭിക്കുമെന്നാണ് അവർ കരുതുന്നത്. എന്നാൽ അവരോട് ക്ഷമിക്കാൻ ജനങ്ങൾ ഇപ്പോൾ തയാറല്ല.’’– നഖ്‌വി വ്യക്തമാക്കി.

2004 മുതൽ രാഹുൽ ഗാന്ധിയാണ് അമേഠിയിൽ നിന്ന് വിജയിച്ചത്. 2019ൽ ബിജെപിയുടെ സ്മൃതി ഇറാനി രാഹുൽ ഗാന്ധിയെ തോൽപിച്ചു. 2024ലെ ലോക്സഭാ തിരഞ്ഞെടുപ്പിൽ അമേഠിയിൽനിന്ന് രാഹുൽ ഗാന്ധി മത്സരിക്കുമെന്ന് കഴിഞ്ഞ ദിവസം ഉത്തർപ്രദേശ് കോൺഗ്രസ് അധ്യക്ഷൻ പറഞ്ഞിരുന്നു. ഇതിനു പിന്നാലെയാണ് ബിജെപിയുടെ പ്രതികരണം.

English Summary: Mukhtar Abbas Baqvi Says Congress Treats Amethi's People Like Chewing Gum