കലാകാരനിൽ നിന്ന് പ്രതീക്ഷിക്കാത്ത പ്രതികരണം, അലൻസിയർ ഖേദം രേഖപ്പെടുത്തണം: ചിഞ്ചുറാണി
Mail This Article
തിരുവനന്തപുരം∙ സംസ്ഥാന ചലച്ചിത്ര അവാർഡ് സമർപ്പണ വേദിയിൽ സ്ത്രീവിരുദ്ധ പ്രസ്താവന നടത്തിയ നടൻ അലൻസിയർ ഖേദം രേഖപ്പെടുത്തണമെന്നു മന്ത്രി ജെ.ചിഞ്ചുറാണി. സംസ്ഥാന സർക്കാരിന്റെ ചലച്ചിത പുരസ്കാരം ഏറ്റുവാങ്ങി അലൻസിയർ നടത്തിയ പ്രസ്താവന അപലപനീയവും സാംസ്കാരിക കേരളത്തിനു നിരക്കാത്തതുമാണ്. അനുചിതമായ പ്രസ്താവന പിൻവലിച്ച് അദ്ദേഹം ഖേദം രേഖപ്പെടുത്തണമെന്നു ചിഞ്ചുറാണി ആവശ്യപ്പെട്ടു.
മനസ്സിൽ ഒളിഞ്ഞിരിക്കുന്ന സ്ത്രീവിരുദ്ധത സ്ഥലകാല ബോധമില്ലാതെ പുറത്തുവന്നതിന്റെ തെളിവാണ് അദ്ദേഹത്തിന്റെ പ്രസ്താവന. സ്ത്രീപക്ഷ കാഴ്ചപ്പാടു മുന്നോട്ടുവച്ചു കൊണ്ടാണു സ്ത്രീയുടെ രൂപം ആലേഖനം ചെയ്ത ശിൽപം നൽകുന്നത്. സർഗ്ഗാത്മകതയുള്ള ഒരു കലാകാരനിൽ നിന്ന് ഒരിക്കലും പ്രതീക്ഷിക്കാത്ത പ്രതികരണമാണ് അലൻസിയറുടെ ഭാഗത്തു നിന്നുമുണ്ടായതെന്നും മന്ത്രി ഫെയ്സ്ബുക്കിൽ പങ്കുവച്ച കുറിപ്പിൽ പറഞ്ഞു.
മനസ്സിൽ അടിഞ്ഞ പുരുഷാധിപത്യത്തിന്റെ ബഹിർസ്ഫുരണം ആണ് അലൻസിയറിന്റെ പരാമർശമെന്ന് മന്ത്രി ആർ.ബിന്ദുവും പ്രതികരിച്ചിരുന്നു. പെൺപ്രതിമ നൽകി പ്രലോഭിപ്പിക്കരുതെന്നും ആൺകരുത്തുള്ള മുഖ്യമന്ത്രി ഇരിക്കുന്നയിടത്ത് ആൺകരുത്തുള്ള പ്രതിമ നൽകണമെന്നുമായിരുന്നു അലൻസിയറിന്റെ പരാമർശം.
English Summary: J. Chinchu Rani respond to Alencier's controversial statement