ഏറ്റവും കൂടുതല് സൗജന്യ ചികിത്സ: ദേശീയ പുരസ്കാര നിറവിൽ കേരളം
Mail This Article
തിരുവനന്തപുരം ∙ രാജ്യത്ത് ഏറ്റവും കൂടുതല് സൗജന്യ ചികിത്സ നല്കിയ സംസ്ഥാനത്തിനുള്ള കേന്ദ്ര സര്ക്കാരിന്റെ ആരോഗ്യ മന്ഥന് 2023 പുരസ്കാരം കേരളത്തിന്. കാരുണ്യ ആരോഗ്യ സുരക്ഷാ പദ്ധതിയാണ് (കാസ്പ്) ഏറ്റവും ഉയര്ന്ന സ്കീം വിനിയോഗത്തിനുള്ള മികച്ച പ്രകടനം കാഴ്ചവച്ച സംസ്ഥാനത്തിനുള്ള അവാര്ഡ് കരസ്ഥമാക്കിയത്. എബിപിഎംജെഎവൈയുടെ (ആയുഷ്മാൻ ഭാരത്) വര്ഷിക ആഘോഷങ്ങളുമായി ബന്ധപ്പെട്ടാണ് കേന്ദ്ര സര്ക്കാരിന്റെ നാഷനല് ഹെല്ത്ത് അതോറിറ്റി ആരോഗ്യ മന്ഥന് പുരസ്കാരങ്ങള് പ്രഖ്യാപിച്ചത്.
എബിപിഎംജെഎവൈ പദ്ധതി മുഖാന്തരം രാജ്യത്ത് ഏറ്റവും കൂടുതല് ചികിത്സ നല്കിയ സംസ്ഥാനം, പദ്ധതി ഗുണഭോക്താക്കളായുള്ള കാഴ്ച പരിമിതര്ക്കായി പ്രത്യേകം ലഭ്യമാക്കിയ സേവനങ്ങള്ക്ക് 'മികവുറ്റ പ്രവര്ത്തനങ്ങള്' എന്നീ രണ്ട് വിഭാഗങ്ങളിലാണ് പുരസ്കാരങ്ങള് ലഭിച്ചത്. ഇതില് രാജ്യത്ത് ഏറ്റവും കൂടുതല് ചികിത്സ നല്കിയ സംസ്ഥാനം എന്ന വിഭാഗത്തില് ഈ സര്ക്കാരിന്റെ കാലത്ത് തുടര്ച്ചയായി മൂന്നാം തവണയാണ് പുരസ്കാരനേട്ടം.
എല്ലാവര്ക്കും ആരോഗ്യ പരിരക്ഷ എന്നതാണ് സര്ക്കാര് നയമെന്ന് ആരോഗ്യമന്ത്രി വീണാ ജോര്ജ് പറഞ്ഞു. പരമാവധി പേര്ക്ക് സൗജന്യ ചികിത്സ ലഭ്യമാക്കുക എന്നുള്ളതാണ് സർക്കാരിന്റെ ലക്ഷ്യം. സാമ്പത്തിക പരിമിതികള്ക്കിടയിലും പാവപ്പെട്ട രോഗികളുടെ ചികിത്സ ഉറപ്പാക്കാന് സംസ്ഥാന സര്ക്കാര് നടത്തുന്ന പരിശ്രമങ്ങള്ക്കും പ്രവര്ത്തനങ്ങള്ക്കുമുള്ള അംഗീകാരം കൂടിയാണ് ഈ പുരസ്കാരമെന്നും മന്ത്രി പറഞ്ഞു.
സംസ്ഥാനത്ത് കഴിഞ്ഞ രണ്ട് വര്ഷം കൊണ്ട് കാരുണ്യ ആരോഗ്യ സുരക്ഷാ പദ്ധതി ഉള്പ്പെടെയുള്ള പദ്ധതികളിലൂടെ 3200 കോടിയിലധികം രൂപയുടെ സൗജന്യ ചികിത്സ നല്കാനായി. കാസ്പ് പദ്ധതി വഴി കഴിഞ്ഞ രണ്ട് വര്ഷങ്ങളിലായി 13 ലക്ഷത്തോളം ഗുണഭോക്താക്കള്ക്ക് 30 ലക്ഷത്തോളം ക്ലെയിമുകളിലൂടെ ചികിത്സ നല്കി. ഈ ഇനത്തില് കേന്ദ്ര വിഹിതമായി കഴിഞ്ഞ വര്ഷം 151 കോടി രൂപ മാത്രമാണ് സംസ്ഥാനത്തിന് ലഭിച്ചത്. ബാക്കി വരുന്ന ചെലവ് സംസ്ഥാന സര്ക്കാരാണ് വഹിക്കുന്നത്. നിലവില് കാസ്പിന് കീഴില് വരുന്ന 42 ലക്ഷം ഗുണഭോക്താക്കളില് 20 ലക്ഷത്തിലധികം പേര് പൂര്ണമായും സംസ്ഥാന ധനസഹായമുള്ളവരാണ്. ആരോഗ്യ വകുപ്പിന് കീഴില് സ്റ്റേറ്റ് ഹെല്ത്ത് ഏജന്സി മുഖാന്തരമാണ് സംസ്ഥാനത്ത് പദ്ധതി നടപ്പാക്കുന്നത്.
English Summary: Kerala wins Arogya Manthan award for providing free medical care to maximum number of people