കർണാടക ബിജെപിയിൽ അഴിച്ചുപണി; വിജയേന്ദ്ര യെഡിയൂരപ്പ പുതിയ അധ്യക്ഷൻ

കർണാടക∙ കർണാടകയിൽ അഴിച്ചുപണിയുമായി ബിജെപി. മുൻമുഖ്യമന്ത്രിയും മുതിർന്ന ബിജെപി നേതാവുമായ ബി.എസ്. യെഡിയൂരപ്പയുടെ മകൻ വിജയേന്ദ്ര യെഡിയൂരപ്പ എംഎൽഎയെ പുതിയ ബിജെപി പ്രസിഡന്റായി നിയമിച്ചു. അടിയന്തിരമായി സ്ഥാനമേറ്റെടുക്കാനാണ് ബിജെപി ദേശീയ അധ്യക്ഷൻ ജെ.പി.നഡ്ഡ ഉത്തരവിറക്കിയിരിക്കുന്നത്. 

ബിജെപിയുടെ കർണാടകയിലെ പത്താമത്തെ സംസ്ഥാന അധ്യക്ഷനാണ് വിജയേന്ദ്ര യെഡിയൂരപ്പ. 2019ൽ നിയമിതനായ  സംസ്ഥാന അധ്യക്ഷൻ നളിൻ കുമാർ കട്ടീലിൽ നിന്നാണ് അദ്ദേഹം സ്ഥാനം ഏറ്റെടുക്കുന്നത്. കർണാടക നിയമസഭാ തിര‍ഞ്ഞെടുപ്പിൽ ശിക്കാരപുരയിൽ നിന്നും 11,008 വോട്ടുകൾക്കാണ് വിജയേന്ദ്ര നിയമസഭയിലെത്തിയത്.