ആദ്യം പുക, പിന്നാലെ തീ ഉയർന്നു; തൊടുപുഴയിൽ ഓടിക്കൊണ്ടിരുന്ന ബൈക്ക് തീപിടിച്ച് നശിച്ചു

തൊടുപുഴ∙ തൊടുപുഴയിൽ ഓടിക്കൊണ്ടിരുന്ന ബൈക്ക് തീപിടിച്ച് നശിച്ചു. കോലാനിയിൽ ഇംസൺ പാപ്പച്ചൻ ഓടിച്ച ബൈക്കാണ് തീപിടിച്ച് നശിച്ചത്. തിങ്കളാഴ്ച രാവിലെ 10.30 ഓടെ കോലാനി പ‍ഞ്ചവടി പാലത്തിനടുത്തായിരുന്നു സംഭവം. ഇയാളുടെ ചേട്ടൻ ശ്രയാംസിന്റെ പേരിലുള്ളതാണ് ബൈക്ക്. തീ പടർന്ന ഉടനെ ബൈക്ക് നിർത്തി ഇറങ്ങിയതിനാൽ വലിയ അപകടം ഒഴിവായി.

ഇംസൺ ബൈക്കിൽ പുറത്തേക്ക് ഇറങ്ങിയപ്പോൾ കാലിന് സമീപം ചൂട് തോന്നുകയായിരുന്നു. പിന്നാലെയാണ് പുക ഉയർന്ന് തീപിടിച്ചത്.  നാട്ടുകാരുടെ നേതൃത്വത്തിൽ തീ അണയ്‌ക്കാൻ ശ്രമിച്ചെങ്കിലും വിജയിച്ചില്ല. പിന്നാലെ അഗ്നിരക്ഷാസേനയെത്തി തീ അണയ്ക്കുകയായിരുന്നു. തീപിടിത്തത്തിന്റെ കാരണം അറിയുന്നതിനായി മോട്ടർ വാഹനവകുപ്പ് പരിശോധന നടത്തേണ്ടതുണ്ട്.