കേന്ദ്രം ഒഴിവാക്കിയ ചരിത്രഭാഗങ്ങൾ ഉൾപ്പെടുത്തി പാഠ്യപദ്ധതി പരിഷ്കരിക്കും: ശിവൻകുട്ടി

കൊച്ചി∙ കേന്ദ്രം ഒഴിവാക്കിയ ചരിത്രഭാഗങ്ങൾ ഉൾപ്പെടുത്തി പാഠ്യപദ്ധതി പരിഷ്കരിക്കുമെന്നു വിദ്യാഭ്യാസമന്ത്രി വി.ശിവൻകുട്ടി. കേരളത്തിലെ പാഠപുസ്തകത്തിൽനിന്നും ഇന്ത്യ എന്ന പദം മാറ്റില്ലെന്നും നവകേരള സദസ്സിൽ ശിവൻകുട്ടി പറഞ്ഞു. 

പാഠ്യപദ്ധതി പരിഷ്കരണവുമായി സർക്കാർ മുന്നോട്ടു പോവുകയാണ്. ഈ വരുന്ന ജൂൺ മാസത്തിൽ 1, 3, 5, 7, 9 ക്ലാസുകളിലെ പുതുക്കിയ പാഠപുസ്തകങ്ങൾ സ്കൂൾ തുറക്കുന്നതിനു രണ്ടാഴ്ചയ്ക്കു മുൻപ് കുട്ടികളുടെ കയ്യിൽ എത്തിക്കും. 2025 ജൂണിൽ 2, 4, 6, 8, 10 ക്ലാസുകളിലേക്കുള്ള പുതുക്കിയ പാഠപുസ്തകവും നൽകാൻ കഴിയുമെന്നു പ്രതീക്ഷിക്കുന്നതായി ശിവൻകുട്ടി പറഞ്ഞു.