റേഷൻ ട്രാൻസ്‍‌പോർട്ട് കരാറുകാരുടെ സമരം പിൻവലിച്ചു; റേഷൻ വിതരണം ബുധനാഴ്ച പുനരാരംഭിക്കും

കൊച്ചി∙ റേഷൻ ട്രാൻസ്‌പോർട്ട് കരാറുകാരുടെ അനിശ്ചിതകാല സമരം ഭക്ഷ്യമന്ത്രി ജി.ആർ.അനിലുമായി നടത്തിയ ചർച്ചയെ തുടര്‍ന്ന് പിൻവലിച്ചു. മന്ത്രി ഇടപെട്ട് കരാറുകാർക്ക് നവംബർ മാസത്തെ കുടിശ്ശിക അനുവദിച്ചതിനെ തുടർന്നാണ് സമരം പിൻവലിച്ചത്.

ഇതോടെ സംസ്ഥാനത്തെ റേഷൻ വിതരണവും സംഭരണവും ബുധനാഴ്ച പുനഃരാരംഭിക്കാൻ വഴിയൊരുങ്ങി. നവംബർ മാസത്തെ കുടിശ്ശിക വിതരണം ചെയ്യുന്നതിനായി താലൂക്കുകളിലേക്ക് ലഭ്യമാക്കിയിട്ടുണ്ട്.

ഡിസംബർ മാസത്തേയും ഉടനെ വിതരണം ചെയ്യാമെന്ന് മന്ത്രി ഉറപ്പ് നൽകിയിട്ടുണ്ട്. സപ്ലൈകോ വഴിയാണ് തുക കൈമാറേണ്ടത്.