കൈകഴുകാൻ പോയപ്പോൾ ഹോട്ടലിലെ മേശയിൽനിന്ന് മോഷണം പോയ ഫോൺ തിരിച്ചുകിട്ടി; മോഷ്ടാവ് മുങ്ങി

കോഴിക്കോട്∙ ഭക്ഷണം കഴിച്ചശേഷം കൈകഴുകാൻ പോയ സമയത്ത് യുവാവിന് ഹോട്ടലിൽവച്ച് നഷ്ടമായ മൊബൈൽ ഫോൺ തിരികെ കിട്ടി. മലപ്പുറം പുത്തനത്താണി സ്വദേശി പറക്കുണ്ടിൽ മർസൂക്കിനാണ് ഹോട്ടലിൽനിന്നും ഫോൺ നഷ്ടമായത്. യുവാവിന്റെ പരാതിയിൽ താമരശേരി പൊലീസ് അന്വേഷണം ആരംഭിച്ചതിനു പിന്നാലെയാണ് ഫോൺ തിരികെ ലഭിച്ചത്. അതേസമയം, മോഷ്ടാവിനെ പിടികൂടാനായില്ല.

കോഴിക്കോട് താമരശേരിയിലെ ഒരു ഹോട്ടലിൽ ഞായറാഴ്ച ഉച്ചയ്ക്കാണു സംഭവം. ഹോട്ടലിലെ സിസിടിവി ദൃശ്യങ്ങളിൽ ഒരാൾ ഫോണെടുക്കുന്നത് വ്യക്തമായിരുന്നു. ഇയാൾ അസം സ്വദേശിയാണെന്നും താമരശേരി പരിസരത്ത് ജോലി അന്വേഷിച്ച് നടക്കുന്നയാളാണെന്നും ഹോട്ടൽ ഉടമകൾ വെളിപ്പെടുത്തിയിരുന്നു.

തുടർന്ന് യുവാവിന്റെ താമസസ്ഥലത്തു നടത്തിയ പരിശോധനയിലാണ് ഫോൺ തിരികെ ലഭിച്ചത്. അതേസമയം, യുവാവ് പിടികൊടുക്കാതെ അവിടെനിന്നും മുങ്ങി. പൊലീസ് എത്തുന്നതിനു മുൻപ് നാട്ടുകാരെ കബളിപ്പിച്ച് പ്രതി സ്ഥലം വിടുകയായിരുന്നു.