ഹോങ്കോങ് പ്രക്ഷോഭകർ വിമാനത്താവളം ഉപരോധിച്ചു; സർവീസുകൾ നിലച്ചു

ഹോങ്കോങ് ∙ കുറ്റാരോപിതരെ ചൈനയിൽ വിചാരണ ചെയ്യാനുള്ള നിയമത്തിനെതിരെ പ്രക്ഷോഭം തുടങ്ങിയ യുവാക്കൾ പ്രവേശന കവാടങ്ങൾ ഉപരോധിച്ചതോടെ ഹോങ്കോങ് വിമാനത്താവളത്തിന്റെ പ്രവർത്തനം സ്തംഭിച്ചു. എല്ലാ വിമാന സർവീസുകളും നി‍ർത്തലാക്കിയാതായി അധികൃതർ പ്രഖ്യാപിച്ചു. വിമാനത്താവളം തടസ്സപ്പെട്ടതോടെ രാജ്യത്തെ ഓഹരി വിപണി ഏഴുമാസത്തെ ഏറ്റവും താഴ്ന്ന നിലയിലെത്തി.

പ്രതിഷേധം അതിരുവിട്ട് അരാജകത്വത്തിലേക്കു നീങ്ങുകയാണെന്ന് ചീഫ് എക്സിക്യൂട്ടീവ് കാരി ലാം മുന്നറിയിപ്പു നൽകി. ബ്രിട്ടൻ ഹോങ്കോങ് കൈമാറിയപ്പോൾ നിലവിലുണ്ടായിരുന്ന അവകാശങ്ങളിൽ ചൈന വെള്ളം ചേർക്കുന്നുവെന്നാണ് പ്രക്ഷോഭകരുടെ പരാതി. ചൈനയെ അനുകൂലിക്കുന്ന ലാം രാജിവയ്ക്കണമെന്ന് അവർ ആവശ്യപ്പെടുന്നു.‌