ഇല്ല, മെലനിയ കിമ്മിനെ കണ്ടിട്ടില്ല

ബെയറിറ്റ്സ് (ഫ്രാൻസ്) ∙ യുഎസ് പ്രഥമവനിത മെലനിയ ട്രംപ് ഉത്തരകൊറിയൻ ഏകാധിപതി കിം ജോങ് ഉന്നിനെ കണ്ടുവെന്ന പ്രചാരണം വൈറ്റ് ഹൗസ് നിഷേധിച്ചു. മെലനിയയുടെ ഭർത്താവ് പ്രസിഡന്റ് ഡോണൾഡ് ട്രംപിന്റെ വാക്കുകളാണ് ഇങ്ങനെയൊരു സംശയം ജനിപ്പിച്ചത്.

‘മെലനിയ കിമ്മിനെ കണ്ടുവെന്നും, അദ്ദേഹം വലിയ സാധ്യതകളുള്ള രാജ്യത്തിന്റെ തലവനാണെന്ന് അവർ സമ്മതിക്കുന്നു’ എന്നായിരുന്നു ട്രംപ് പറഞ്ഞത്. ഇതോടെ, മെലനിയ കിമ്മുമായി രഹസ്യ കൂടിക്കാഴ്ച നടത്തിയെന്നു വ്യാഖ്യാനമുണ്ടായി. ഈ തെറ്റിദ്ധാരണയാണ് വൈറ്റ് ഹൗസ് തിരുത്തിയത്. ‘പ്രസിഡന്റ് ഉദ്ദേശിച്ചത്, പ്രഥമവനിത കിമ്മിനെക്കുറിച്ചു മനസ്സിലാക്കി എന്നാണെന്ന് വൈറ്റ്ഹൗസ് വക്താവ് സ്റ്റെഫനി ഗ്രിഷാം പറഞ്ഞു.