ബേബി പൗഡർ പിൻവലിച്ചു

ന്യൂയോർക്ക് ∙ ജോൺസൺ ആൻഡ് ജോൺസൺ ബേബി പൗഡറിന്റെ 33,000 ബോട്ടിൽ യുഎസ് വിപണിയിൽനിന്നു പിൻവലിച്ചു. യുഎസിൽ മരുന്നുകളുടെ നിലവാരം പരിശോധിക്കുന്ന ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ) നടത്തിയ പരിശോധനയിൽ ആസ്ബസ്റ്റോസിന്റെ അംശം സ്ഥിരീകരിച്ചതിനെത്തുടർന്നാണിത്. അർബുദകാരിയായ ആസ്ബസ്റ്റോസിന്റെ 0.00002% അംശം മാത്രമാണ്  കണ്ടെത്തിയത്.

ഇതിനുപയോഗിക്കുന്ന അസംസ്കൃത വസ്തു ശേഖരിക്കുന്ന ഖനിയിൽ ആസ്ബസ്റ്റോസിന്റെ അംശം കണ്ടിട്ടില്ലെന്നും തുറന്ന ബോട്ടിലിൽ മാലിന്യം കടന്നതാകാമെന്നും കമ്പനി അറിയിച്ചു. പരിശോധനയുടെ സാധുത ബോധ്യപ്പെടുന്നതിന് എഫ്ഡിഎയുമായി ബന്ധപ്പെട്ടുവരുകയാണെന്നും കമ്പനി അറിയിച്ചു.