നേപ്പാൾ ദുരന്തം: ഫ്രഞ്ച് സംഘം അന്വേഷണം തുടങ്ങി

കഠ്മണ്ഡു ∙ നേപ്പാളിലെ പോഖരയിൽ ഞായറാഴ്ച വിമാനം തകർന്നു മരിച്ച 71 പേരുടെയും മൃതദേഹങ്ങൾ കണ്ടെടുത്തു. അവശേഷിക്കുന്ന ഒരാൾക്കായി തിരച്ചിൽ തുടരുന്നു. അഗാധമായ മലയിടുക്കുകളിൽ ഡ്രോണുകളുടെ സഹായത്തോടെ തിരച്ചിൽ. 

വിമാനം തകർന്നതു സംബന്ധിച്ച അന്വേഷണത്തിൽ നേപ്പാൾ സർക്കാരിനെ സഹായിക്കാനായി എത്തിയ ഫ്രാൻസിൽനിന്നുള്ള 9 അംഗ വിദഗ്ധ സംഘം അപകടസ്ഥലം സന്ദർശിച്ചു. ഫ്രഞ്ച് നിർമിത എടിആർ–72 വിമാനമാണു തകർന്നത്. മുൻ വ്യോമയാന സെക്രട്ടറിയുടെ നേതൃത്വത്തിലുള്ള അഞ്ചംഗ അന്വേഷണ സംഘത്തെയാണു നേപ്പാൾ സർക്കാർ നിയോഗിച്ചിട്ടുള്ളത്. 45 ദിവസത്തിനകം റിപ്പോർട്ട് നൽകാനാണു നിർദേശം.

English Summary : Nepal plane crash investigation