ഇമ്രാനെ അഡിയാല ജയിലിലേക്ക് മാറ്റി

ഇസ്‍‌ലാമാബാദ് ∙ തോഷഖാന അഴിമതിക്കേസിൽ ശിക്ഷിക്കപ്പെട്ട് പഞ്ചാബിലെ അറ്റോക് ജയിലിൽ കഴിഞ്ഞിരുന്ന പാക്കിസ്ഥാൻ മുൻ പ്രധാനമന്ത്രി ഇമ്രാൻ ഖാനെ റാവൽപിണ്ടിയിലെ അഡിയാല ജയിലിലേക്ക് മാറ്റി. ഇസ്‍‌ലാമാബാദ് ഹൈക്കോടതിയുടെ ഉത്തരവിനെ തുടർന്നാണ് എ ക്ലാസ് സൗകര്യങ്ങളുള്ള ജയിലിലേക്ക് ഇമ്രാനെ മാറ്റിയത്. അദ്ദേഹത്തെ അഡിയാല  ജയിലിലാക്കാനാണ് ശിക്ഷാവിധിയിൽ കോടതി നിർദേശിച്ചിരുന്നത്. എന്നാൽ, പൊലീസ് കൊണ്ടുപോയത് അറ്റോക്കിലേക്കാണ്.  

ഇതേസമയം, 4 മാസം മുൻപ് കാണാതായ ടിവി അവതാരകൻ ഇമ്രാൻ റയിസ് ഖാൻ തിരിച്ചെത്തി. ഇമ്രാൻ ഖാന്റെ അനുയായിയാണ് ഇദ്ദേഹം. ഇമ്രാനെ ജയിലിലടച്ചതിൽ പ്രതിഷേധിച്ചതിന് അറസ്റ്റിലായ റയിസ് മോചിതനായ ശേഷം ഒളിവിലായിരുന്നു.

English Summary : Imran was shifted to Adiala Jail