പുട്ടിനെ വീണ്ടും തിരഞ്ഞെടുക്കാൻ റഷ്യയിൽ വോട്ടെടുപ്പ് തുടങ്ങി

മോസ്കോ ∙ യുക്രെയ്ൻ യുദ്ധത്തിന്റെ നിഴലിൽ റഷ്യയിൽ പ്രസിഡന്റിനെ തിരഞ്ഞെടുക്കാൻ 3 ദിവസം നീളുന്ന വോട്ടെടുപ്പ് തുടങ്ങി. പ്രസിഡന്റ് വ്ളാഡിമിർ പുട്ടിൻ (71) ആറു വർഷത്തേക്കു കൂടി തിരഞ്ഞെടുക്കപ്പെടുമെന്ന് ഉറപ്പാണ്. 11.4 കോടി ജനങ്ങളാണ് വോട്ട് ചെയ്യേണ്ടത്. 

രാജ്യത്തെ 11 സമയമേഖലകളിലും വോട്ടെടുപ്പ് നടക്കും. യുക്രെയ്നിലെ റഷ്യൻ അധിനിവേശ പ്രദേശങ്ങളിലും ബൂത്തുകൾ ഒരുക്കിയിട്ടുണ്ട്. കമ്യൂണിസ്റ്റ് നേതാവായ നിക്കോളെയ് ഖരിത്തനോവ് അടക്കം 3 സ്ഥാനാർഥികളാണു പുട്ടിനെതിരെ മത്സരരംഗത്തുള്ളത്.

2020 ൽ നടത്തിയ ഭരണഘടനാഭേദഗതിയിലൂടെ പുട്ടിനു 2030 ൽ നടക്കുന്ന തിരഞ്ഞെടുപ്പിലും മത്സരിക്കാനാവും. എല്ലായിടത്തും ഉച്ചസമയത്ത് ഒരുമിച്ച് വോട്ടുചെയ്യാനെത്തി ‘പുട്ടിനെതിരെ ഉച്ചസമരം’ നടത്താൻ അലക്സി നവൽനിയുടെ ഭാര്യ യൂലിയ ആഹ്വാനം ചെയ്തു.