2022 ഓഗസ്റ്റ്. പല്ലവ രാജാക്കൻമാരുടെ പെരുമ ലോകത്തെയറിയിച്ച മഹാബലിപുരത്ത് ലോക ചെസ് ഒളിംപ്യാഡ് എന്ന മഹാ മാമാങ്കം. ചരിത്രം തഴുകിയുറങ്ങുന്ന മാമല്ലപുരത്തെ കടൽത്തീരങ്ങൾ ലോക ചെസ് താരങ്ങളുടെ വീരഗാഥകൾ ഏറ്റുപാടുമ്പോൾ ചക്രവർത്തിയായ മാഗ്നസ് കാൾസന്റെ ശ്രദ്ധ മറ്റൊന്നിലായിരുന്നു. രസഹീനമായ സ്വന്തം ടീമിന്റെ പ്രകടമോ സ്വന്തം കളികളുടെ മേന്മയോ നോക്കാതെ, പുതുമുഖ താരങ്ങൾ അണിനിരന്ന ഇന്ത്യ ബി ടീമിന്റെ ബോർഡുകളിലായിരുന്നു കാൾസന്റെ കണ്ണുമുഴുവൻ.
