ഡൽഹിയിൽ വായു മലിനീകരണം അതിരൂക്ഷമായിരിക്കുകയാണ്. ശൈത്യകാലംകൂടി ആരംഭിച്ചതോടെ രാജ്യതലസ്ഥാനത്തെ ഒട്ടുമിക്ക സ്ഥലങ്ങളിലും പുകമഞ്ഞ് മൂടിയ നിലയിലും. സമീപ സംസ്ഥാനങ്ങളിലെ വയലുകളിൽ കൃഷിക്ക് ശേഷം തീയിടുന്നതാണ് പുകമഞ്ഞിനു പ്രധാന കാരണം. രണ്ടാഴ്ചക്കാലം ഈ സ്ഥിതി തുടരുമെന്ന് കാലാവസ്ഥാ കേന്ദ്രത്തിന്റെ മുന്നറിയിപ്പെത്തിയതിനു പിന്നാലെ പ്രൈമറി സ്കൂളുകൾക്ക് സർക്കാർ അവധി നൽകി. നഗരത്തിലെ റോഡുകളിൽ വെള്ളം തളിച്ചും കൂടുതൽ മെട്രോ സർവീസ് നടത്തിയും ഇതര സംസ്ഥാനങ്ങളിൽനിന്നെത്തുന്ന ഡീസൽ വാഹനങ്ങൾക്ക് പ്രവേശനം നിഷേധിച്ചും മലിനീകരണം കുറയ്ക്കാനുള്ള ശ്രമം നടക്കുന്നുണ്ട്.