മുഹമ്മദ് ഷമിയുടെ കയ്യിൽ നിന്നു പാഞ്ഞ തീയുണ്ടകൾക്കുള്ളിൽ ഇന്ത്യയുടെ ഹൃദയമിടിപ്പ് ഉണ്ടായിരുന്നു. ഇന്ത്യയുടെ ക്രിക്കറ്റ് ജനതയെ തന്റെ കൈകളിലേക്ക് ആവാഹിച്ചാണ് കീവികളുടെ നെഞ്ച് ഷമി തകർത്തത്. മുംബൈ വാങ്കഡെ സ്റ്റേഡിയം അതോടെ ത്രസിച്ചു. കപ്പിലേക്ക് ഇനി ഒരേ ഒരു വിജയത്തിന്റെ ദൂരം മാത്രം. ഞായറാഴ്ച വരെ അതിനായുള്ള ആകാംക്ഷാഭരിതമായ കാത്തിരിപ്പ്. ഫൈനലിൽ എതിരാളി ഓസ്ട്രേലിയയോ ദക്ഷിണാഫ്രിക്കയോ? അത് ഇന്നറിയാം.