‘ആനെഹൊണ്ടെ’യിൽ തീർന്ന ജീവിതങ്ങൾ; ‘‘ഉദാ ഉദാ’’ വിളി മുഴങ്ങുന്ന മാഘപൗർണമി; ദേവദാസികൾക്ക് രക്ഷകരെത്തിയോ?

മാഘപൗർണമി, കർണാടകയിലെ പെൺജീവിതങ്ങൾക്ക് അതു ശരിക്കും അമാവാസിയായിരുന്നു. ആഘോഷങ്ങളുടെയും ആചാരങ്ങളുടെയും ഒരു ദിവസത്തെ വർണക്കാഴ്‌ചയാണ് ഈ പൗർണമി. അതു കഴിഞ്ഞാൽ കുറേ സ്ത്രീകളെ പിന്നെ കാത്തിരുന്നത് നിറംകെട്ട ജീവിതമായിരുന്നു. പണ്ട്, കർണാടകയിലെ യെല്ലമ്മ ക്ഷേത്രങ്ങളിൽ വാത്മീകി, മാതികാ സമുദായത്തിൽപ്പെട്ട പെൺകുട്ടികളെ ദേവദാസിയാക്കിയിരുന്നതു മാഘമാസത്തിലെ പൗർണ‌മി നാളിലായിരുന്നു. മാഘപൗർണമിക്കു കർണാടകയിലെ ഉച്ചംഗിമലയിലേക്കു നടത്തിയ യാത്ര 2014 ഫെബ്രുവരി 02ന് ‘മലയാള മനോരമ’ ‘ഞായറാഴ്ച’യിൽ പ്രസിദ്ധീകരിച്ചതിന്റെ 10–ാം വാർഷികത്തിൽ അങ്ങോട്ടു വീണ്ടും ഒരു യാത്ര പോകുകയായിരുന്നു, 2024 ഫെബ്രുവരി 23ന്; ഉച്ചംഗിമലയിലെ ഈ വർഷത്തെ മാഘപൗർണമി കാണാൻ.