‘വേണ്ടാത്ത ഒന്നും സഹിച്ചു നിക്കണ്ട മക്കളേ, ഇങ്ങു പോന്നേര്’: പുതിയ പുരുഷനും വരട്ടെ; ‘തേച്ചിട്ടു പോയി’ എന്ന് കരയാമെന്നു മാത്രം!

അഞ്ച് അമ്മാവന്മാരിൽ മൂന്നുപേർ വിവാഹം കഴിക്കാതെ, വൃദ്ധരായി മരിച്ചു. ഒരാൾ അംഗപരിമിതനായിരുന്നു. അധ്യാപകനും കവിയുമായിരുന്ന രണ്ടാമത്തെയാൾ സ്വജാതിയിൽത്തന്നെയുള്ള ഒരു ടീച്ചറെയാണ് പ്രേമിച്ചതെങ്കിലും ജാതിക്കുള്ളിൽ അക്കാലത്തു പിന്നെയും പാലിച്ചിരുന്ന ഉപജാതി വ്യത്യാസം കാരണം അവരുടെ വിവാഹം നടന്നില്ല. രണ്ടാളുടെയും പ്രണയകഥ മൊയ്തീനെയും കാഞ്ചനമാലയെയും ഓർമിപ്പിക്കും. മൊയ്തീൻ ചെറുപ്പത്തിൽ മരിച്ചു. കാഞ്ചനമാല ഇപ്പോഴും ജീവിച്ചിരിക്കുന്നു. അവരെക്കാൾ കുറച്ചു പ്രായം ചെന്ന രാമൻനായരു മാഷും കുഞ്ഞിലക്ഷ്മി ടീച്ചറുമാകട്ടെ വേറെ വിവാഹമൊന്നും കഴിക്കാതെ, ഒറ്റയ്‌ക്കൊറ്റയ്ക്കു ജീവിച്ചാണ് കടന്നുപോയത്. മൂന്നാമത്തെ അമ്മാവൻ പ്രണയനൈരാശ്യത്താൽ ചെറുതായി മാനസികനില തെറ്റിയതുകൊണ്ടായിരുന്നു ഒറ്റയ്ക്കു ജീവിച്ചുമരിച്ചത്.