ജീവിതത്തിൽ ഏറെ ആഗ്രഹിച്ചിട്ടും നടക്കാതെ പോയ ഒരു കാര്യം എന്താണെന്നു ചോദിച്ചാൽ ഉമ്മൻചാണ്ടി എന്തുത്തരമായിരിക്കും നൽകുക? എന്നെന്നും നിഴലായി അദ്ദേഹത്തിന്റെ ഒപ്പമുണ്ടായിരുന്നവരോട് ഇക്കാര്യം ചോദിച്ചാൽ ഭൂരിപക്ഷവും പറയും– ‘ഒരു ദിവസത്തിൽ 24 മണിക്കൂറെന്നതു മാറ്റി കുറച്ചുകൂടെ സമയം കൂട്ടിക്കിട്ടിയിരുന്നെങ്കിൽ’ എന്ന ആഗ്രഹമായിരിക്കാം അത്. ആ ആഗ്രഹം നടക്കില്ലെന്നറിഞ്ഞതുകൊണ്ടാം, 24 മണിക്കൂറിലെ ഓരോ സെക്കൻഡിനെയും ദിവസവും അദ്ദേഹം ഓടിത്തോൽപിച്ചുകൊണ്ടിരുന്നത്! ഞായറാഴ്ചകളിൽ ഉമ്മൻ ചാണ്ടി പുതുപ്പള്ളിയിലാണ്. എത്രയോ വർഷങ്ങളായി; അതിനു മാറ്റം വന്നത് അപൂർവമായി മാത്രം. പുതുപ്പള്ളിയിലെത്തുന്ന ആ 24 മണിക്കൂർ സമയം ഉമ്മൻ ചാണ്ടി ആകെ ഉറങ്ങുന്നത് നാലു മണിക്കൂർ!