നീണ്ട 19 വർഷം, ചിത്രലേഖയും ഭർത്താവും വാങ്ങിയത് 5 ഓട്ടോകൾ. അതിൽ നാലെണ്ണവും ഇപ്പോൾ അവരുടെ കൈവശമില്ല. ഒരെണ്ണം ചിലർ കത്തിച്ചു. കടബാധ്യത കൂടിയപ്പോൾ മറ്റുള്ളവ വിറ്റു. അവശേഷിച്ച ഓട്ടോയാകട്ടെ 2023 ഓഗസ്റ്റ് 25ന് രാത്രി കത്തിനശിക്കുകയും ചെയ്തു. ആ ഓട്ടോ ചിത്രലേഖയുടെ വീട്ടുമുറ്റത്തുതന്നെ കിടപ്പുണ്ട്. അതിനു നേരെ വിരൽ ചൂണ്ടി ചിത്രലേഖ പറയുന്നു ‘‘എന്നെ മാനസികമായി തളർത്താനാണ് അതിവിടെ ഇട്ടിരിക്കുന്നത്. ഓരോ ദിവസവും അത് കണ്ടുതന്നെ ഞാൻ ഉണരുകയും ഉറങ്ങുകയും ചെയ്യണമെന്ന വാശിയാണ് ചിലർക്ക്. കഴിഞ്ഞ ഓണത്തിന് പൂക്കളമിട്ട തറയിൽ ഇത്തവണ കത്തിയമർന്ന ഓട്ടോയുടെ കരിപ്പാടുകളായിരുന്നു’’, മനോരമ ഓൺലൈൻ പ്രീമിയത്തിൽ മനസ്സ് തുറക്കുകയാണ് ചിത്രലേഖ.