വിമാനത്തെയും വെല്ലുവിളിച്ച് വരുന്നു വന്ദേ ഭാരത് സ്ലീപ്പർ; ബെംഗളൂരുവിലേക്കും സൂപ്പർ എസി യാത്ര; കണ്ടോ ഈ സൗകര്യങ്ങൾ!

ഇനി എന്നാണ് വന്ദേഭാരത് ട്രെയിനിൽ കിടന്നു യാത്ര ചെയ്യാൻ പറ്റുക..? ട്രെയിൻ യാത്രയെ മാറ്റിമറിച്ചു കുറച്ചു കാലമായി വന്ദേ ഭാരത് കേരളത്തിന്റെ തെക്കും വടക്കും ഓടുകയാണ്. ചെയർകാർ ആയ വന്ദേഭാരതിൽ ഇരുന്നു യാത്ര ചെയ്യുന്നവരുടെ അടുത്ത ആഗ്രഹമാണിത്. വന്ദേ ഭാരത് സ്ലീപ്പർ ട്രെയിനുകൾ കൂടി വേണ്ടേ. വന്ദേഭാരതിൽ ഇരുന്നു മടുത്തതു കൊണ്ടല്ല ഈ ആഗ്രഹം. അത് അത്യാഗ്രഹവുമല്ല. കേരളത്തിലെ ട്രെയിനുകളിൽ നല്ല പങ്കും സ്ലീപ്പറുകളാണ്. മലയാളിക്കു പോകേണ്ടത് ബെംഗളൂരുവിനും ചെന്നൈയ്ക്കും മൂംബൈയ്ക്കും മറ്റുമല്ലേ. വന്ദേ ഭാരത് വന്നതോടെ ട്രെയിൻ യാത്ര സൗകര്യങ്ങൾ നിറഞ്ഞ അനുഭവമായി മാറുകയും ചെയ്തു. സ്ലീപ്പർ വന്ദേ ഭാരത് വന്നാൽ ഇപ്പോഴത്തെ പല രാത്രി ട്രെയിനുകളും സ്ലീപ്പറാകും.