തഴയുമെന്നറിഞ്ഞിട്ടും മുന്നിൽനിന്ന് പൊരുതിക്കയറി; ഒടുവിൽ, മധ്യപ്രദേശിന്റെ മനസ്സറിഞ്ഞ മാമാജിക്ക് ‘മോഹ’ഭംഗം

2017ലാണ് മധ്യപ്രദേശിലെ മൻസോറിലുണ്ടായ പൊലീസ് വെടിവയ്പിൽ 5 കർഷകർ കൊല്ലപ്പെടുന്നത്. ഇതോടെ സംസ്ഥാനത്തിന്റെ പടിഞ്ഞാറൻ മേഖലയിൽ അക്രമം പടർന്നു. അവിടെ സമാധാനം പുനഃസ്ഥാപിക്കാൻ മുഖ്യമന്ത്രിയായ ശിവ്‍രാജ് സിങ് ചൗഹാൻ കണ്ടെത്തിയത് ഒരു പ്രത്യേക മാർഗമാണ് – അനിശ്ചിതകാല നിരാഹാരം. എന്തായാലും രണ്ടാം ദിവസം അക്രമ സംഭവങ്ങൾക്ക് അറുതിയായി, ചൗഹാൻ തന്റെ സമരവും അവസാനിപ്പിച്ചു. സ്വന്തം പൊലീസ് കർഷകരെ വെടിവച്ചു കൊലപ്പെടുത്തിയതിനു ശേഷം സമാധാനം പുനഃസ്ഥാപിക്കാൻ മുഖ്യമന്ത്രി സമരം ചെയ്യുന്നത് ശരിയാണോ എന്ന ചോദ്യത്തിന് ചൗഹാന്റെ രാഷ്ട്രീയത്തിൽ പ്രസക്തിയില്ല. അടിയൊഴുക്കുകളും കുതികാൽവെട്ടലുകളും ഒതുക്കലുകളുമെല്ലാം നിറഞ്ഞ രാഷ്ട്രീയത്തിൽ ചൗഹാൻ മധ്യപ്രദേശിലെ മുഖ്യമന്ത്രി കസേരയിലിരുന്നത് പതിനാറര വർഷമാണ്.