ഏറ്റുമുട്ടി ദേവസ്വം ബോർഡും പൊലീസും‌! മരക്കൂട്ടം കടക്കാൻ 4 മണിക്കൂർ; പമ്പാ യാത്ര ഉപേക്ഷിച്ച് ടാക്സിക്കാർ: ആരു സഹായിക്കും തീർഥാടകരെ?

ശബരിമല തീർഥാടനത്തോടനുബന്ധിച്ച് മാസങ്ങൾക്ക് മുമ്പേ വലിയ തോതിലുള്ള ഒരുക്കങ്ങൾ നടത്താറുണ്ട്. ഓരോ വർഷവും തീർഥാടകരുടെ എണ്ണം കൂടിവരുന്ന സാഹചര്യത്തിൽ അതിന് അനുസൃതമായി സൗകര്യങ്ങളിലും വർധനവ് വേണ്ടതുണ്ട്. എന്നാൽ വിവിധ ഏജൻസികൾ തമ്മിൽ ഏകോപനമില്ലാതിരിക്കുകയും പരിചയസമ്പന്നരായ ഉദ്യോഗസ്ഥരുടെ അഭാവം ഉണ്ടാവുകയും ചെയ്താൽ ഈ ഒരുക്കങ്ങളെല്ലാം താളംതെറ്റും. അതിന്റെ ഏറ്റവും നല്ല ഉദാഹരണമാണ് ഈ ദിവസങ്ങളിൽ ശബരിമല തീർഥാടകരുടെ തിരക്ക് നിയന്ത്രിക്കുന്നതിൽ വന്ന പാളിച്ച. കിലോമീറ്ററുകൾ താണ്ടി വന്ന തീർഥാടകർ വലിയ ദുരിതങ്ങളിലൂടെയാണ് ഈ ദിവസങ്ങളിൽ കടന്നു പോയത്. ഒട്ടേറെ പേർ ദർശനം നടത്താതെ തിരിച്ചുപോയി.