ഇനി ‘ലാൻഡ് ഫോണുകൾ’ വേറെ ലെവൽ; ഇന്റർനെറ്റിന് അതിവേഗം; അറിഞ്ഞോ ‘മിഷൻ ബിഎസ്എൻഎൽ’?
![Fibre-optic Cable Fibre-optic Cable](https://img-mm.manoramaonline.com/content/dam/mm/mo/premium/news-plus/images/2024/4/29/optical-fiber-connection-.jpg?w=1120&h=583)
Mail This Article
സ്മാർട് ഫോണുകളുടെയും മിന്നൽ വേഗത്തിലുള്ള ഇന്റർനെറ്റ് കണക്ഷനുകളുടെയും യുഗത്തിൽ, പഴയ ബിഎസ്എൻഎൽ ലാൻഡ്ലൈനുകൾക്ക് വിചിത്രവും ഗൃഹാതുരവുമായ ചിലത് ഉണ്ട്. പലർക്കും ഇത് ആശയവിനിമയത്തിനുള്ള ഒരു ഉപാധി മാത്രമായിരുന്നില്ല; ജീവിതത്തിന്റെ ഭാഗം കൂടിയായിരുന്നു. ഇടനാഴിയിലെ മേശപ്പുറത്ത് അഭിമാനത്തോടെ ഇരിക്കുന്ന കറുത്ത ഫോൺ, ഓരോ നമ്പറും ഡയൽ ചെയ്യുമ്പോൾ ഉണ്ടാകുന്ന ശബ്ദം ഇപ്പോഴും ഓർക്കുന്നുവരുണ്ടാകും. പരിചിതമായ ആ റിങ്ടോണിനായി കാത്തിരിക്കുമ്പോൾ വലിയ പ്രതീക്ഷകളായിരുന്നു. പുറം ലോകവുമായി ബന്ധം സ്ഥാപിക്കാൻ അന്ന് റിസീവറിലൂടെ ലഭിച്ചിരുന്ന ആ ശബ്ദം മാത്രമായിരുന്നു. ലാൻഡ്ലൈൻ ഒരു ആശയവിനിമയ ഉപകരണം മാത്രമായിരുന്നില്ല അത്, പ്രത്യേകിച്ച് ദൂരെ താമസിക്കുന്നവർക്ക് ഒരു ജീവനാഡി ആയിരുന്നു. ഇന്ന് ബിഎസ്എൻഎൽ ലാൻഡ്ലൈനിന് പകരം കൂടുതൽ നൂതനമായ സാങ്കേതിക വിദ്യകൾ വന്നിട്ടുണ്ടാകാം, എങ്കിലും ആ പഴയ ലാൻഡ്ഫോൺ ഇനി പുതിയ രൂപത്തിൽ അവതരിപ്പിക്കാൻ പോകുകയാണ് ബിഎസ്എൻഎൽ. നിങ്ങളുടെ വീട്ടിലെ ബിഎസ്എൻഎൽ ലാൻഡ്ഫോൺ ഇനി പഴയ ഫോണല്ല– സീൻ മാറുകയാണ്. ഈ വർഷം അവസാനത്തോടെ കേരളത്തിലെ ഒൻപതു ലക്ഷത്തോളം വരുന്ന ലാൻഡ്ഫോണുകളും അടുത്ത ലെവലിലേക്കു മാറും. ഒപ്റ്റിക്കൽ ഫൈബർ കേബിളിലേക്ക് ലാൻഡ് ഫോണുകൾ മാറ്റുന്ന മിഷൻ കൺവർഷൻ അവസാന ഘട്ടത്തിലേക്ക് കടക്കുകയാണ്. ആകെയുള്ള ലാൻഡ്ഫോണുകളിൽ മൂന്നിൽ ഒന്നു മാത്രമാണ് ഇനി പുതുതലമുറയിലേക്കു മാറാനുള്ളത്.