സഖ്യകക്ഷികൾക്ക് മന്ത്രിസ്ഥാനമുണ്ട്, അതൃപ്തിയും; പ്രധാന വകുപ്പുകൾ വിടാതെ ബിജെപി; കാലിടറുമോ?

സഖ്യകക്ഷികളുടെ പിന്തുണയോടെയാണ് ഭരണം സാധ്യമായതെന്ന പ്രതീതി പരമാവധി ഒഴിവാക്കിയുള്ളതായിരുന്നു മന്ത്രിസഭാ രൂപീകരണം. വകുപ്പുകളുടെ വിഭജനത്തിലും ബിജെപി അതേ രീതി തുടരുകയാണുണ്ടായത്. പ്രധാന വകുപ്പുകളെല്ലാം ബിജെപിക്കു തന്നെ. ആഭ്യന്തരം, പ്രതിരോധം, ധനം, വിദേശകാര്യം, റോഡ് ഗതാഗതം എന്നീ വകുപ്പുകൾ നേരത്തേ കൈകാര്യം ചെയ്തിരുന്നവർ ഇത്തവണയും തുടരുകയാണ്. കർഷക സമരത്തിന്റെ പശ്ചാത്തലത്തിൽ പ്രശ്നസ്വഭാവമുള്ളതായി മാറിയ കൃഷി മന്ത്രാലയം മുൻ മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാനെ ഏൽപിച്ചത് ശ്രദ്ധേയമാണ്. ഒപ്പം, ഗ്രാമവികസനവും ചൗഹാന് നൽകിയിട്ടുണ്ട്.