‘തോമസുകുട്ടീ, കിട്ടുന്ന കാശുമായി വിട്ടോടാ..’ എന്നാണു ചൈനയിലെ വിദേശ നിക്ഷേപകരോട് ഏതാനും മാസം മുൻപ് പ്രമുഖ രാജ്യാന്തര നിക്ഷേപകനും വിപണി വിദഗ്ധനുമായ മാർക് മൊബിയസ് മുന്നറിയിപ്പ് നൽകിയത്. കടുത്ത നിയന്ത്രണങ്ങളുമായി വിദേശ നിക്ഷേപകരെ വരിഞ്ഞു മുറുക്കുന്ന പ്രവണത ചൈനീസ് അധികൃതരിൽനിന്ന് തുടരുന്നതാണ് അതു പറയാൻ മൊബിയസിനെ പ്രേരിപ്പിച്ചത്. ഷാങ്ഹായിലെ എച്ച്എസ്ബിസി ബാങ്കിലുള്ള തന്റെ അക്കൗണ്ടിൽനിന്ന് പണം പിൻവലിക്കാൻപോലും അദ്ദേഹത്തിനു കഴിയുന്നില്ലത്രെ. പണം എങ്ങനെ സമ്പാദിച്ചു എന്നതു സംബന്ധിച്ച് കഴിഞ്ഞ് 20 വർഷത്തെ കണക്ക് ചോദിച്ചിരിക്കുകയാണ് അധികൃതർ. പരസ്യമായി നിഷേധിക്കുമ്പോഴും രാജ്യത്തിനു പുറത്തേക്ക് പണം കൊണ്ടുപോകുന്നതിന് പല നിയന്ത്രണങ്ങളും വന്നിരിക്കുന്നു എന്നതിന്റെ സൂചനയാണിത്.