മുസ്‌ലിം ലീഗിനെ യുഡിഎഫിൽനിന്ന് അടർത്തിയെടുക്കാനാവുമോയെന്നു സിപിഎം ആലോചിക്കാൻ തുടങ്ങിയിട്ടു നാളുകളേറെയായി. എന്നെങ്കിലും ലീഗ് പടി കടന്നെത്തുമെന്ന പ്രതീക്ഷയോടെ ഉറക്കമിളച്ചു കാത്തിരിക്കുന്നു സിപിഎം നേതൃത്വം. ലോക്‌സഭാ തിരഞ്ഞെടുപ്പ് ആസന്നമായിരിക്കെ, ലീഗിനെ കൂടെക്കൂട്ടി പിടിച്ചു നിൽക്കാനുള്ള സിപിഎമ്മിന്റെ പുതിയ അടവുനയം ഫലിക്കുമോ? കോഴിക്കോട്ട് ലീഗ് നടത്തിയ പലസ്തീൻ ഐക്യദാർഢ്യ റാലിക്കു പിന്നാലെ അതേ കോഴിക്കോട്ട് സിപിഎം നടത്തുന്ന റാലിയിലേക്ക് ലീഗിനെ ക്ഷണിച്ച കൗശലം ഫലിക്കാതെ പോയത് എന്തുകൊണ്ടാണ്? തൊട്ടുപിന്നാലെ, അന്തരിച്ച നേതാവ് ആര്യാടൻ മുഹമ്മദിന്റെ മകൻ ആര്യാടൻ ഷൗക്കത്തിന്റെ നേതൃത്വത്തിൽ മലപ്പുറത്ത് അരങ്ങേറിയ യുദ്ധവിരുദ്ധ റാലിയിലും സിപിഎം കണ്ണു വയ്ക്കുന്നു. കോൺഗ്രസ് നേതൃത്വത്തിന്റെ വിലക്ക് മറികടന്നു റാലി നടത്തിയ ആര്യാടൻ ഷൗക്കത്തിനെതിരെ പാർട്ടി നടപടി വന്നാൽ സ്വീകരിക്കാൻ തയാറായും സിപിഎം നിൽക്കുന്നു. രാഹുൽ ഗാന്ധിയുടെ മണ്ഡലമായ വയനാട് ഉൾപ്പെടുന്ന മലബാറിൽ സിപിഎമ്മിന്റെ പുതിയ അജൻഡയുടെ ഭാഗമാണോ ഈ നീക്കങ്ങൾ?