‘അരി തരുന്നത്’ മോദി, ചിത്രമെവിടെയെന്ന് നിർമല; കാശ് ചോദിച്ചതെന്തിനെന്ന് കേരളം; അന്നം ആയുധമാകുമ്പോൾ...

അരി നമുക്ക് അന്നമാണ്. ‘അരി’ക്ക് ശത്രുവെന്നും ഒരർഥമുണ്ട്. അടുത്ത കാലത്ത് അരിയുടെ പേരില്‍ നടക്കുന്ന കോലാഹലങ്ങൾ ശ്രദ്ധിച്ചാൽ ഇങ്ങനെയും സംശയം തോന്നാം. നാട്ടിൽ അരി വിതരണം ചെയ്താൽ ‘അരി’കളുടെ അഥവാ ശത്രുക്കളുടെ എണ്ണം കൂടുമോ? ഭക്ഷ്യക്ഷാമമുണ്ടായി ലക്ഷക്കണക്കിന് പേർ മരിച്ച നാടാണിത്. അന്നും അരി അടക്കമുള്ള ഭക്ഷ്യധാന്യം ചർച്ചയിലുണ്ട്. ക്ഷാമത്തിൽ നിന്നു കരകയറാൻ ഹരിത വിപ്ലവം നടത്തിയ ഇന്ത്യ ഇന്ന് അരി കയറ്റുമതി ചെയ്യുകയാണ്.