അതുകൊണ്ടരിശം തീരാതെ...

വേണ്ടാ, ആ കളി വേണ്ടാ...’’ എന്നു മുഖ്യമന്ത്രി പിണറായി വിജയൻ പറഞ്ഞത് മട്ടന്നൂരിലെ വിവാദം വിടാതെ ഏറ്റുപിടിച്ച മാധ്യമപ്രവർത്തകരോടാണെന്നു ശുദ്ധാത്മാക്കൾക്കേ തോന്നൂ. പക്ഷേ, അതു സ്ഥലം എംഎൽഎയും മുൻ ആരോഗ്യമന്ത്രിയുമായ കെ.കെ.ശൈലജയ്ക്കു നേരെയുള്ള ‘ഒരു പ്രത്യേകതരം ഏക്‌ഷനാ’ണെന്നു പാർട്ടിക്കും പിണറായിക്കും ഒപ്പമുള്ളവർക്കു മുതൽ കുലംകുത്തികൾക്കു വരെ പറഞ്ഞുകൊടുക്കേണ്ട കാര്യമൊന്നുമില്ല. ടീച്ചർക്കു മാത്രമല്ല, ഭർത്താവും നാട്ടിൽ പാർട്ടിയുടെ ഒന്നാം നമ്പർ നേതാവുമായ കെ.ഭാസ്കരനും കാര്യങ്ങൾ കൂടുതൽ തെളിഞ്ഞിട്ടുണ്ടാവണം. കാഴ്ച ക്ലിയറാകാൻ മുപ്പതിനായിരത്തിന്റെ കണ്ണട എല്ലാവർക്കും എപ്പോഴും അത്യാവശ്യമല്ല.