ഉച്ചരിച്ചു കുഴപ്പത്തിലാകരുതേ!

‘മദ്യപ്രദേശ് മുക്കിയ മന്ത്രി’ എന്നു പറയുന്നത് എത്രയോ ആക്ഷേപകരമാണ്. പക്ഷേ ആ രീതിയിലുള്ള ഉച്ചാരണം സർവസാധാരണമായിരിക്കുന്നു. ബയങ്കരചൂട്, ബയങ്കരമഴ എന്നെല്ലാം പലരും പറയുന്നതു കേട്ടാൽ ആരും നെറ്റി ചുളിക്കാറില്ല. കാര്യം മനസ്സിലായാൽപ്പോരേ, എന്തിനു ഉച്ചാരണത്തിലെ കൃത്യതയ്ക്കായി വാശിപിടിക്കുന്നു എന്നു ചോദിക്കുന്നവരുമുണ്ട്. പക്ഷേ ഭാഷാസ്നേഹവും ആശയവിനിമയത്തിലെ കൃത്യതയും പുലർത്തേണ്ടവർ ഉച്ചാരണം കഴിയുന്നത്ര ശരിയാക്കുന്നതിൽ ശ്രദ്ധിച്ചേ മതിയാകൂ. മാന്യമായ ഏതെങ്കിലും വേദിയിൽക്കയറിനിന്ന് ഇത്തരത്തിലെല്ലാം സംസാരിക്കുന്നത് പരിഹാസ്യമാകുമെന്നു തീർച്ച. മലയാളത്തിലെ ഉച്ചാരണപ്പിശകിനോട് ഉദാരമനോഭാവം കാട്ടുന്നവർ ഇംഗ്ലിഷ് വാക്കുകളുടെ ഉച്ചാരണത്തിലെ ചെറിയ പിശകിനോടു പോലും അസഹിഷ്ണുത കാട്ടിക്കളയും. അവരുടെ തന്നെ ഇംഗ്ലിഷ് ഉച്ചാരണത്തിൽ വൈകല്യങ്ങളുണ്ടെങ്കിലും അവ തിരിച്ചറിയാതെയാകും മലയാളപ്പിശകിനോടു പ്രതികരിക്കുന്നത്.